Muy Keridos Korelijionarios.
“Pesah” ke fiestamos komo el kumpleanyo de la salidura de Ayifto de nuestros ansestros, los Ebreos, enkavesados por Moshe Rabenu, no es solo el kumpleanyo de un evenemento istoriko si no ke es una oportunidad de rebivir este evento dentro nuestra mente i renovelar nuestro esprito en todas las epokas.
Yo penso ke kuando resitamos la beraha “Sheeheyanu Vekiyemanu Veigianu Lazeman Aze” antes de resitar la Agada de Pesah i “Rengrasiamos a el Todo Poderozo” por ayegarmos a fiestar otra vez esta fiesta bien emportante, tenemos de ser konsientes de este punto de vista.
Muy klaro ke el Livro Shemot de nuestra Santa Tora mos eksplika tanto detalyadamente la salidura de Ayifto de nuestros ansestros, los Ebreos, ke nozotros puedemos tomar enerjia de esto i desbarasarmos de nuestros diferentes prejugamientos i rekuperar nuestra libertad mentala. Siendo ke semos los eredores meresientes de nuestra Santa Ley la primera monoteista de la umanidad i los transmetedores de esta kultura tenemos el dover de ser “Or Lagoyim/Luz a los Puevlos” solo a kondision de ser bien atados a las “Valores del Djudaizmo” ke estos ultimos provienen de nuestra santa Tora i de nuestra vida komun desde kuarenta siglos i son el trezoro de nuestra egzistensia.
Esto bien konvensido ke el “Seder de Pesah” es el medio el mas apropriado para transmeter nuestras valores a nuestros ninyos ke estos ultimos son la garansia de nuestro futuro. Espero ke nuestros keridos ermanos ke no mankaran de profitar de esta oportunidad. Keridos Ermanos.
Siendo ke semos una kolektividad kompozada de bien aedados i nos estamos amenguando entretiempo tiene muncha emportansia el ser en armonia i solidaridad. Konfeso ke so el observante i agradesiente por sus abnegasion seya de nuestros dirijentes de la komunidad i seya de nuestras institusiones. Espero ke nuestros ermanos no mankaran de apoyarles i sostenerles en todo modo de senso.
Espero i sueto ke el “Pesah” ke mos apregona la primavera mos dara la notisia de un futuro de mas prospero i pas en el universo.
Bendizyendo a todos vozotros kon las bendisiones de la Tora vos auguro un Pesah yeno de felisidad i repozo kon vuestra famiya i serkanos en el entorno del “Seder de Pesah”.
Hag Pesah Sameah
Rav Isak HALEVA
Gran Rabino
