El umor judio es konkreto. Se trata de un tema spesifiko. Se burla de munchas kozas, de la vida de los judios, de muestro amor por paras, del komerso, del antisemitizmo, de la relijion, de muestras tradisiones, de la madre judia, de la famiya judia, de munchas kozas ke mos enteresa. Mezmo, munchas vezes mos aze riir en las situasiones ke son de yorar.
El umor judio es muy tolerente. Tenemos munchos kuentos ke kritikan mezmo muestra relijion. Mozotros, en los kuentos, kritikamos solo los judios, ma nunka no mos burlamos de las otras nasiones. No kritikamos el komporto de los otros kontra los judios, ma mos burlamos del komporto de los judios kontra los otros.
Lo mas esansiel de todo en los judios, es la famiya. La madre i el padre judio azen todo lo ke pueden para ke sus ijos adelanten. Lo mas, la madre judia. La madre judia (komo dizen ‘yiddishe mama’ en la literatura), es mas fuerte del padre, i le pasa mas muncho la palavra kon los ijos.
El umor judio tambien puede ser sarkastiko. A las vezes, el tema del umor es mas fuerte de la riza. A las vezes, en lugar de rizas, las reaksiones mas esperadas son envitasiones a pensar. Munchas vezes kritika la grandeza i la ipokrizia.
El umor judio es demokratiko i es kontra la otoridad. Ay anekdotas ke kritikan los politikos i los administradores de la sosiedad en jeneral. La anekdota toma komo tema a los rabinos, savios, maestros, medikos, empresarios i filantropos de la komunidad i la kontradiksion entre el puevlo i el poder governante. Se trata del konflikto del judio kon su entorno i kon su komunidad...
El umor judio an jeneral es seriozo. Amostra los konfliktos de la mente i la lojika, analiza situasiones ke separa la rasionalidad del absurdo. A las vezes, el uniko buto del umor puede ser azer riir la djente. Ma, munchas vezes, los djugos mentales se eskonden detras del umor. Ay unos ke son krítikas, otros pueden ser enstruktivos o filozofikos, i tambien pueden ser un espejo para mozotros.
Te ries a una anekdota ma duspues sin kerer empesas a pensar. Puedemos dizir ke los judios son "pensadores djugetones". Sus vida difisil los aze realistos.
Ay burlas yamadas "shtoch", ke se empleya para redusir la arogansia de las personas ke se ven a si mas superiores i mas fuertes de los otros. El umor judio es un instrumento muy fuerte utilizado para kritikarse a si en la sosiedad. El umoristo, komo un profeto, aferra la djente en sus puntos febless. Los rabinos, los fonkionarios governamentales i los rikos siempre fueron utilizados komo sujetos de umor. El umor se utilizo para protejer los proves del abuzo de los superiores. Se puede dizir ke es una forma de relaksasion sosyal.
