I Pesah ya eskapimos Baruh Ashem, kon su parnasa i kon sanedad. Ma de otra parte esto mirando kada Pesah la meza se esta azyendo mas chika. En la famiyas, los grandes malorozamente mas no estan, estan en sus repozos, los ijos ken esta afuera, ken tyene echo, los primos uno mora leshos, el otro mora ahuera de Estanbol. Kada uno tyene una bavajada, i esto vyendo ke en todas las famiyas, las mezas de mued kada anyo un poko mas se estan enchikesyendo malorozamente...
Todo se izo muy karo, para un pranso kere miles i miles, por esto kada famiya se esta pensando a yamar djente. Antes no era este modo, kada Pesah 20-25 personas aviya en las kazas, i a los vizinos los yamavan, puede ser i akel tyempo no era barato ma el byen teniya valor, una persona mirava a una kaza. No komo agora, dos personas bile kon lavoro no estan salyendo a bash.
I la agada bile no esta dando savor komo antes, antes meldavan los grandes 5-6 personas endjuntos en primero en ebreo, despues en ladino sureyava oras.
No komo agora un pasuk melda, 2 ojas abolta. Despues de komer empesava kantikas, agora ke kantikas, despues de komer kada uno se kere fuyir.
Mozos eramos 8 personas, en muestra famiya kada anyo la primera noche estavamos ande mi, la sigunda noche, ande el primo grande, i dos noches meldavamos la agada.
Yo lo eskrivi lo ke esto vyendo en las famiyas, no kije dizir ke todos estan este modo, ma malorozamante en jeneral es komo lo eskrivi, i munchos ya no estan mirando Pesah bile, solo primera noche matsa i tamam. Antes de bayram demanyana aviya bohorot, los kales estavan yenos, agora muy poko ni esto kedo.
Yene rogamos al Dio ke i este anyo kon sanedad i kon la famiya lo eskapimos el Pesah. Para kada anyo, pujados i no amungados. AMEN!
