No se si meldatesh el Şalom de la semana pasada ke era el numero spesial para Pesah. Una gazeta de 48 ojas. En esta epoka ande todos tyenen el preteksto de no dar publisidades porke no ay buenas relasyones kon los Israelyanos. Todos deven de saver ke semos Djudios i no Israelyanos. En este numero vemos 55 publisidades. No konosko todos los patrones o responsavles ke dan estas publisidades ma kreo ke entre 10 i 12 de estas son patrones o responsavles Djudios manko ke 20%. Puedemos dizir ke la djente se alishtreo a la kriza de Gazza. O puedeser devo de felisitar el ekipo de publisidad del semanario Şalom ke reusheron a konvenser la djente para ke den estas publisidades al Şalom.
Djusto oy, diya de alhad, el mayor de Estanbol, el Sinyor Ekrem İmamoğlu dyo una deklarasion kontra el Hamas dizyendo ke es una organizasion terorista. De la otra vanda los Amerikanos anularon el enkontro de Biden kon Erdoğan, el Prezidente de la Republika Turka. Demandimos kualo es la razon? Kreo ke la razon es porke Erdoğan esta semana resivio a İsmail Haniye; uno de los mas importantes lideres del Hamas en su posto. Oyemos kada alhad en las televisiones las manifestasiones ke se estan realizando en Israel spesialmente en Tel Aviv. Reelmente ay serka de 7 mezes ke Israel esta okupado kon el problem de Gazza i los rehenes ke se topan en las manos de los militanes del Hamas. Este alhad en la televion los militanes del Hamas amostraron dos esklavos Israelyanos ke se topan en las manos de los militanes los sesh mezes dalkavo.
Ay unas kuantas semanas ke vemos manifestasiones kontra Israel i la politika Amerikana en las universidades de los Estados Unidos. El governo i la polisiya estan kontra estas manifestasyones. I esto esta kreendo un antisemitizmo en los Estados Unidos. Ya savemos ke en los estados Unidos se topa serka de 3 miliones i 900 mil muzulmanos. I es solo el 1.1 de la populasyon del payiz. Ma esta vez no es solo los Palestinianos o los Muzulmanos ke estan protestando la situasion. Ay todo modo de djente. Espero ke vamos a topar la pas en un tyempo serkano.
