Antes 15 diyas selebrimos el kamino de la libertad PESAH, kon alegriya, kon pransos i meldimos la agada kon grande emosyon. Ma el 5-6 Mayo estuvimos un poko triste porke era Rekuerdo del Holokosto,Yom HaShoa. Malorozamente sin kulpa i sin pekados, a 6milyones de personas, solo porke eran Djudyos los mataron en la segunda gerra mundial. Kon espanto, kon amargura, kon tristeza paso en Auschwitz, en Birkenau, en Bergen, en Treblinka los 6 anyos, sin komer, kon hazinuras, kon lavorar, i la fin a las kamaretas de gaz. Kuando estas pensando, te esta vinyendo una demanda al tino: DEKE?
Solo en la segunda gerra mundial, no no no en el anyo 17 empeso el antesemitizmo kuando los Romanos mataron miles, en 1348, en Fransia 20.000 djudyos fueron kemados solo porke eran djudyos. En 1483, en Espanya en la engizisyon miles, en 1905 en Odesa, en 1917 los Bolshevikes i mas...
La vida mos paso kon inimigos. I a la fin el mas grande fue en 1939-1945. 6.000.000 i por esto estamos dizyendo nunka mas, i por esto estamos dizyendo del 1948 el Dio ke no mos manke de las tyerras santas.
La estorya de Yom haShoa empeso en 1938 en la noche 9 al 10 Novembre en la Alemanya por parte de los Nazis kontra los djudyos, en la noche de Kristales. Los grupos paramilitares del partido nazi, empesaron a kemar las sinagogas, empesaron a romper los djames de las botikas; empesaron a kemar los livros de ley, las ropas en medyo de las kayes. Empesaron a entrar a las kazas, i este modo empeso la estorya de Yom haShoa. Ma kuando kayimos, ya parvinimos a alevantarmos.
Kuando se aserka el diya de Yom haShoa nombraos a Anne Frank ke este en ganeden, komo paso los anyos en una kamareta, komo se eskondyo...
Por esto dizimos nunka mas, nunka no te olvides, syempre akodrate!
