La fiesta de Pesah no es solo 8 diyas. Es una fiesta ke tiene aparejos desde Purim i despues tiene ermozos uzos ke kada uno tiene un simbolo sinyifikativo.
Ya savemos ke entre los aparejos de Pesah de antes i de agora ay muncha diferensya. Ma ay unas kozas ke no trokaron. I kontinuamos a azerlos porke mos akodramos de muestras madres i muestros padres ke mos kayenta el korason. Kada uzo ke azemos mos alegra i los transmetemos a muestros ijos i inyetos kon kara riyente i alegriya.
Uno de estos es la prasinagua.
El ochen diya de Pesah ke a la nochada vamos a komer pan, despues de medyo diya mos vamos a los kampos (ke en la sivdad no kedo mas) a bushkar vedruras ke se yaman Prasinagua. Estas vedruras son yervas ke salen de suyo de la tierra. Mizmo entre las piedras se pueden topar. I en las guertas i los parkes ay yervas, ma son yervas sembradas. No salieron de suyo.
Unos dizen ke el nombre viene de la prasa, porke las ojas vedres de la prasa paresen a la prasinagua. Otros dizen ke es una kombinasyon del grego i espanyol. Komo prasina ke es vedre i agua. En todo kavzo kual nombre ke seya, para mozotros es prasinagua. Yo se ke los gatos i los perros komen estas yervas por melizina, kuando tienen el estomago deranjado. No komen otras yervas mas ke estas.
El ochen diya arekojemos buen karar de yervas i las trayemos a kaza… Las dispersamos en la kaza entera i metemos en las chantas un buketiko de prasinagua. Esto es para ke puje muestra azlaha komo pujan estas yervas de suyo, solo kon la ayuda del Dio. Este uzo era siempre komo una aventura. “Por aki ven”, “No, aki ay mas munchas” arankavamos i arankavamos i las trayiyamos a kaza i echavamos en todos los lugares, ke se inyervava mi madre a la fin. Porke se enbatakava la kaza i despues al otro diya kaliya alimpyarlas.
Despues de la prasinagua merkavamos i bonbones de akide, ke era hametz de komer en Pesah. Kuando ya eskapo el diya, ampesavamos a komer kon los bonbones dulses para ke se aga todo dulse.
Aparte de este uzo aviya i un otro. Era meter el afikomin aryentro los portmones. Este afikomin era un pedaso de la matza ke metiyamos debasho de los manteles. Mi tiya diziya ke kale tener este afikomin siempre kon mozotros porke kuando mos vamos a ir a Israel, ke akel tiempo era kon vapores, i si al safek iva salir una furtuna, si echas este pedasiko de afikomin a la mar, pishin la furtuna se kalma.
Agora mas no ay vapores para viyajar, ay aviones. I si mos toma una furtuna ke es turbulans en el aver, kualo vamos azer? Avriremos la ventana del avion i echaremos el afikomin de la ventana abasho? Dizish ke se kalma la turbulans???
Los uzos ke tomimos de muestras madres, es muestro dever de transmeterlas a muestras ijos. I eyos a los suyos.
