La salidura de Ayifto, el salto verso la libertad afuera de la opresion i del esklavaje se paso en una noche, ma el prosesus de redempsion tomo muncho mas tyempo. Los ijos de Israel estuvyeron kaminando, erando, kantando 40 anyos en el dizyerto antes de alkansar la Tierra Bendicha prometida por el Sinyor del mundo a su puevlo. La jenerasion salida de Ayifto se esparesera en el dizierto i es los desendyentes de estos esklavos ke fueron sedo el apreto de Faraon, ke van a tener el zehud de konkerir i entrar en Israel i formar un puevlo poderozo en sus Patria. Los ke fuyeron de Ayifto resivyeron la Tora en el dizyerto de Sinay i se dezbarasaron poko a poko de sus estados de esklavos, komyeron la Mana kayida del sielo, bevyeron la agua de la Roka, i pasaron revoltas i kastigos… ma es solo sus ijos, la mueva jenerasyon (aparte Yeushua, Bennun i Kaleb Ben Yehuna) ke van eregar de este muevo paiz de leche i de miel i van a gozar de una kompleta libertad, kedando siguro atados a los komandamientos del Sinay. En entrando en esta tyerra mueva el Dyo Baruhu ordono a Yeushua i a los ijos de Israel de aplikar 2 mizvotes ke no pudyeron egzekutar en el dizyerto: el BERIT MILA i la ofranda del KORBAN de PESAH “Toma kuchiyos i aze la MILA de todos los ijos de Israel “Ordona el Dyo a Yeushua el muevo Lider del puevlo a ken Moshe Rabenu remetyo antes su disparisyon aviya pasado sus poderes kon la Semiha ke le dyo a el. El Berit es la primera Mitsva ke se akompliso. Eya marka en el puerpo del ombre su apartenensya a la aliansa, al atamyento a su puevlo a todos desendyentes de Avraam Avinu ke akompliso el primer Berit de la istorya. La sigunda Mitsva, el Korban Pesah sera echo por kada ijo de Israel. La mueva jenerasion kedara atada a estas 2 Mitsvotes de sus abuelos. Despues ke los Bene Israel izyeron estas 2 Mizvotes van a ampesar una vida mueva de lavoro i endependensya se van ambezar a arar, i sembrar i bivir. La Mana no va kayer mas de los sielos, van a komer el fruto de sus lavoros… El primer Pesah en tierra de Israel avre una era mueva de lavoro, libertad i prosperita todo en kedando atados a sus Leyes, a su Kriyador i a sus Mitsvotes. El primer Pesah en Tierra Santa marka un paso emportante en muestra istorya, los Bene Israel ke estavan kampados en Guilgal selebraran el 14 del mez de Nisan verso la noche el Primer Pesah en sus tierras, al diya sigiente komeran el trigo de sus tierras, izyeron Matsotes kon los granos torifianos en la lumbre; todos komyeron el fruto de sus tierras, los ijos de Israel no son mas esklavos, no son dependyentes de dinguna fuersa ajena i kruela… Solo a sus Dyo Santo, guadrador de Israel para siempre.
