Sigunda noche de Pesah empesamos a kontar el “Omer”, 49 noches. Komo esta eskrito en el livro de Vayikra, kada ijo de Yisrael es ovligado de kontar. Despues de Omer, resivimos la fiesta de Shavuot. I esto tambien esta eskrito en la Tora en el livro de Vayikra.
El tiempo de Omer es muy emportante en la istorya Judia. En el tiempo de Rabi Akiva, vente i kuatro mil elevos de el se muryeron en una epidemia. Esta epidemia se termina el trenta i tres de el Omer. Este dia lo yamamos “Lag Laomer.” Los primeros trenta i tres dias de Omer es tiempo de dolyo por la pedrida de los savyos muy grandes. Despues de Lag Laomer se eskapa el dolyo. Por esto este dia se konta un dia de alegria para mozotros.
El dia de Lag Laomer tiene kontakto kon el savyo Rabi Akiva. Uno de sus elevos Rabi Shimon Bar Yohay eskrivyo el livro ke yamamos el Zohar. Rabi Shimon bar Yohay mos desho la vida en este dia. Tenemos la tradisyon ke el mos disho de no azer dolyo en el dia de su muerte porke su muerte se konto komo “ilula” ke es boda. Por esto en este dia lo nombramos en meldando el Zohar.
Kuando estava en Izmir en la noche de Lag Laomer uzavamos de kantar pizmones komo “Bar Yohay" ke se kanta en Estambol. Kantavamos tambien el pizmon de E.l Mistater. Afuera de estos kantavamos un pizmon en Judeo Espanyol en makam Hüzzam.
“Un dia komo oy azemos orasyon
Kon korason alegre esperamos salvasyon
AE.l berahamav mos apiadara
Zehut de Ribi Shimon mos mamparara
Por su nombre El ara
Puevlo ke a El espera, El lo salvara.”
Es una noche kuando se ensyende munchas kandelas en la sinagoga. Esta noche se konta komo una fiesta. Despues de este dia kaminamos kon mas grande gusto para resivir la Ley en Shavuot.
Rogamos kon el zehut de los savyos de Yisrael ke el Todo Poderozo mos balde todas las setensyas malas i fuertes i mos mandara el rihmidor presto. Rogamos ke vengan los dias ke estan eskritos el en livro de el profeta Yeshaya, dias yenos de pas, alegria i temor de D-o.
