El Todo Poderozo nos esta enkomendando, dizyendo: Devesh ser santos, porke yo so santo. Sovre este sujeto kontinua la perasha: Kada uno i uno devesh temar de vuestra madre i de vuestro padre, i guadrar mis Shabatot. Kada persona i persona deve tener temor de su padre i de su madre. En los dyez komandamyentos esta enkomendansa es dicha ‘Onora a tu padre i a tu madre. Es muy byen savido ke jeneralmente las kreaturas tyenen myedo de sus padres mas ke de sus madres. Por esta kavza vino la Tora en la perasha de Kedoshim nos enbezo el orden del Kriyador dizyendo, deves de tener espanto de tu madre i de tu padre. Pozo a la madre antes de el padre. Kere dizir la onor i el myedo ke vas a tener a tu padre deve ser igual a la onor i al myedo ke vas a tener a tu madre.
La kontinuasyon del verseto es ansi: devesh de guadrar a mis Shabatot. Es defendido de esbivlar el Shabat. En la kreasyon de la persona egzisten tres faktores, el Kriyador, el padre i la madre. Por esta kavza es ke vino en un versetola santedad de el Kriyador, i al komporto ke devemos tener verso nuestros djenitores. Devemos ser personas korektas i azer syempre lo ke es djusto. Meldamos en la perasha, delantre de uno ke no esta atinando no pozes un entronpeso; es muy siguro ke kavzaras la kayida suya. Esto se puede entender i en este senso: alguna persona ke vino a tomar un konsejo en algun sujeto ke el inyora, deves de aklararlo, dizirle lo ke es lo djusto i no entronpeserlo.
A el lavorante ke ya eskapo su lavor de vista deves de pagar su paga i no azerlo sufriyir. Deves de estimar a tu kompanyero komo a tu mizmo. Estas enkomendansas ke meldamos en la Tora, traye a la kompanyia pas, repozo i trankilidad.
