Oy vos kero kontar lo ke mos afito, en keryendo djugar kumar.
Aviya visto en la televizyon un program de Uğur Dündar, el jurnalisto. El se aviya ido a un kazino i les demando a los patrones komo lavoran estas makinas ande se echa jetones i se piza al boton para ke en el ekran de esta makina venga 3 serezas o 3 estreyas lado kon lado para ganar paras. I si no viene, las peryes. El patron del kazino le amostro komo se avre detras las makinas i se arregla para ke no se gane siempre. Es ke ay enganyamyento i no shans. Esto me kedo en el meoyo.
Despues de tiempos se izo muncha moda de ir a estos kazinos ke lo mas se topavan en los oteles luksuozos. Aviya un bufe muy muy riko. Se topava de todo. Komo dizimos en turko, lo ke mankava era solo leche de pasharo. Los ke se ivan aya, komiyan i beviyan de estas maraviyas. Mizmo sigaros o puros les ofriyan todo debaldes. Las bevyendas eran debaldes sin limit. Beve ke beveras. Despues de esto todo, se ivan a merkar jetones i se asentavan delantre las makinas.
De oyir lo ke estan kontando, dishimos i mozotros mos iremos. Mos fuimos, komimos i bevimos i despues merkimos unos kuantos jetones i mos asentimos delantre las makinas. Echavamos un jeton, pizavamos a un boton, o se peryiya el jeton o ganavamos mas jetones. Ma yo siempre teniya el tino en lo ke mos konto Uğur Dündar. Por esto me dishe ke aparte de los jetones ke merki, mas no va merkar. Aviya personas ke peryiyan kazas i moradas del amor de este kumar dezmazalado.
A mi marido no le plaze dingun djugo. Ni kartas, ni tavli, ni satranch, ni nada. Ma estas makinas le plazyo muncho. Djusto ke ya ampeso a djugar, despues de 15 puntos ensupito la makina ampeso a kitar luzes, muzika. Ke esta afitando?? Todos vinieron a mirar. Los ke lavoravan aya ampesaron a felisitarlo. Al pareser ke aviya ganado el premio grande. Ampesaron a kayer los jetones komo riyo. No estava kedando. Ya estava muy bueno, mos ofriyeron shampanya. I se metyo de muevo a djugar. Estava echando los jetones a uno a dos ma no estava ganando nada. Keridos lektores, ansina ansina en medya ora peryo todo lo ke gano.
No demandesh la pena ke le izo. I los inyervos ke le vino. Komo puede ser ke se le fue esta toda rikeza. Kaliya arekojer estos jetones, i konvertirlos en paras i alevantar. Ma dainda sin tomar el plazer, komo alevantar? Akeya noche paso una sehora ke no pudo durmir noche entera de la palpitasyon. I despues mos arepintimos de ir a estos kazinos. No paso muncho tiempo ya se serraron i mas no mos kedo el tino aya.
