En el anyo 1950 la populasion Judiya de Polonya ke era de 3 milyones i medyo (3.500.000) antes la Shoah aviya abashado a 9 mil (9.000) ke se topavan la mas parte en las sivdas Varshova, Krakov i Lotz. Los ke se aviyan fuyidos en el tyempo de la gerra i refujiados sovre todo en Rusia tornaron a Polonya malgrado sus dezeyos de azer Aliya a Erets Israel, visto ke las otoritades Bolshevikas no davan el permiso de emigrasion, la situasyon en Polonya estava muy dura a todo punto de vista i kuando en la eskola Judiya se ampeso la edukasion en Polonezo, los Judyos peryeron la esperansa de salir de esta tyerra i siempre diziyan kon dolor (Aki vamos a estar ovligados a kedar fasta la vinida del Mashiah). En este anyo 1950, la komunita Judiya no parvino a alkansar de merkar ke solo una kasha de portokal de Erets Israel por fyestar Tu-Bishvat. El presyo de estas frutas ke en Israel las yamavan mansanas de oro era muy alto, kada famiya ke puediya alkansar a esta fruta no parveniya a merkar ke una sola portokal. Paryentes i kriyaturas chikos i grandes salyendo debasho la inyeve ivan kon alegriya a merkar una portokalika de la Tyerra Santa, esta fruta de oro tan dezeyada. En kada kaza esta Portokal se metiya en el mas ermozo i luksiozo plato de kaza i se plasava en medyo de la meza. Los vizinos Judyos viniyan a ver esta fruta Santa de la tyerra leshana. Las kriyaturas envitavan a sus amigos polonezos para amostrarles la fruta de la Tyerra Bendicha. En la noche de Tu-Bishvat 1950, se asentaron las famiyas Judiyas al torno de la meza para la Seuda de fyesta, todos meldaron la beraha de Sheehiyanu i bore peri aets, alavando al Kriyador ke kriyo la fruta del arvole… Se tomo el kuchiyo, se mundo la portokal i se dyo a kada uno una revanadika delgada de esta fruta i kada persona komyo kon kavod en respirando en eya el parfum de la tyerra prometida por El Santo Bendicho El, a su puevlo kerido ke no peryo nunka la esperansa. Diyas mijores, Amen!
