Ay anyos ke no estamos mirando en las televisiones las kompetisiones de las kantikas del Eurovision. La Turkiya no esta partisipando a esta kompetision los 12 anyos dalkavo. Deke? Porke tyene un aspekto politiko. Es djusto. Kada anyo esta kompetision tyene un aspekto politiko. De vez en kuando es kontra; i de vez en kuando tyene un aspekto pozitivo. Mi opinyon es ke por esta razon no puedemos dar karar de no partisipar a esta kompetisiones… Este anyo fue un problem politiko por la partisipasion del Estado de Israel. Durante los problemes ke estamos bivyendo en el Medio Oriente, Israel estava pronto del empesijo. Ma syertos payizes estavan kontra Israel i no kerian ke tome lugar en esta kompetision. Kada payis dyo una nota para todos los payizes. I vemos ke Israel esta en el ochen rango. Ma no savian ke la intelijensia Djudia i Israeliana lavoraron para ke Israel sea en un rango mas alto. I reelmente fue de esta manera. I en unos kuantos puntos fue en el primer rango. Ma dospues kon los otros payizes la situasion troko, i a la fin de la Kompetision Israel topo luıgar en las mijores sinko kantikas. Reelmente un sukseso muy emportante en esta situasion.
Deke la kantador Israelyana estava en esta sivdad de la Suedia en una kamareta del otel ande se topava, no la desharaon ke salga afuera. Ni los Israelyanos; ni los de la Suedia no reusheron a protejar esta mujer ke reprezentava el Estado de Israel. A la fin de la kompetision vimos ke munchas personas estavan kontentes. Los Evropeos porke Israel no gano; los Israelyanos, porke tuvieron un sukseso bastante alto.
Reelmente deke tanto politika! en una kompetision de kantikas? Ma kreo ke esta kompetision tyene muncho dar i aver kon la politika kon los payizes evropeos. I por esta razon no se si la Turkiya reelmente tyene razon de no partisipar a esta kompetision.
