Los judios de Jamaika tuvieron un grande rolo en la evolusyon del payiz. Izieron kontribusyones sinyifikativas a la sosyedad.
La egzistensya de los Judios en Jamaika data desde el 15en i 16en siglo. Los Judios sefaradis ke biviyan en la Espanya, fuyeron de la engizisyon i se enstalaron en diferentes payizes, komo en el Imperio Otomano, en el Norte de la Afrika i un grupo en los Karaibes. Los ke fuyeron eran lo mas Maranos, ke en la vida de kada diya se viyan komo kristianos ma en sus vidas privadas biviyan komo judios i aziyan las tradisyones judiyas.
Despues ke Kristof Kolomb topo esta izla en 1494, i despues ke los Ingleses konkistaron la izla en 1655, ampesaron a establesersen munchos Judyos aki.
Los Judios eran mas liberos aki, toparon okazyones de komersyos i ampesaron a tener rikeza i siguro poder. Ampesaron a muchiguarsen i tuvieron komunidades. Eyos estavan azyendo tanbien el komercho de kanyas de asukar.
La mas antigua sinagoga de Jamaika ke se yama Shaare Shalom se fraguo en 1704 en Kingston. Esta sinagoga esta dainda aktiva i sirve komo Sentro de la Komunitad.
La komunitad judiya fue muy emportante para el developamiento de la ekonomiya i kultura de Jamaika. Espesiyalmente en el komersyo, en las bankas i en la ekonomiya de las plantasyones. Mas i mas las tradisyones i las festividades judias adjustan kolor a la diversidad kultural del payiz. Los simeteryos judios dokumentan la egzistensya istorika de esta komunidad.
Aunke la populasyon judiya en Jamaika se aminguo oy, la komunidad esta dainda aktiva i se esforsa para prezervar su erensya kultural. La komunidad judiya de Jamaika kontinua a ser un grupo chiko ma unido.
La kolor de los judios de Jamaika, oy en diya son muy diferentes. Es el rezultado de la meskla kon grupos etnikos diferentes kon tiempo.
Los primeros ke vinieron a la izla eran los ke se fuyeron de la Espanya i del Portugal, de sorte ke eran todos, tipo Mediteraneo. Kon tiempo komo rezultado de los kazamientos mikstos i la meskla kon jamaikanos lokales i otros grupos etnikos, salyo en medio personas kon diferentes kolores entre los judios de Jamaika. Oy en diya es posivle de ver personas blankas, fonses, pretas i varios tonos entre los judios de Jamaika.
