Djueves, el 16 de Mayo 2024 a la ora 19.30, estuve envitada a una konferensya en la universitad Boğaziçi, Estanbol.
El sujeto de la konferensya era, Organizasyon de artes editoriales i edukativos de diferentes liguas ke estan para deperdersen. El buto de la organizasyon era arekojer a syertas personas, ver sus ovras i sintir sus lavoros.
El moderator FIRAT GÜLLÜ tomo la palavra, prezento a los avlantes i disho:
“Estambol era una sivdad onde se avlava diferentes linguas i se eskriviya senaryos ke se djugavan en las salas de teatros”.
Dospues kon sira tomaron palavra los avlantes.
El primer fue, djugador, eskritor i direktor de los teatros en lingua djudeo espanyol, muestro kerido, İZZET BANA.
Dospues ke se dyo a konoser, dyo a entender el nasimyento del teatro de los djudyos de Turkiya, del empesijo en 1946 asta oy 2024. El oy en diya, esta aparejando un arshivo maraviyozo, kreygo ke va deshar una erensya muy presyoza a la komunidad djudiya.
El sigundo avlante fue BOGOS ÇALGICIOĞLU duayen del teatro de los Ermenis de Turkıya. El teatro en lingua ermeniya tyene una istorya byen vyeja kaji de 200 anyos. El konto ke syempre djugaron teatros en esta lingua maternel i mezmo traduizyeron ovras klasikas komo HAMLET i munchas otras.
El treser avlante era del teatro de los gregos de Turkiya ma tuvo una ekskuza en el ultimo momento i no vino. Mando su boz ma fue byen kurto.
La dalkavo avlante, BERFİN ZENDERLİOĞLU, era djugadera profesyonel i enstrukrora de arte de shena. Konto el pasado del teatro kurdo i dyo sus keshas politikas.
A la fin todos los avlantes djugaron un chiko pasaje de la pyesa HAMLET kada uno en su lingua.
El moderator eskapo kon estas palavras:
Dezeamos de azer un teatro en todas estas linguas todos endjuntos. Espero ke estos eventos kontinuen i las linguas ke no se deperdan i ke se arebiven.
Yo, en esta konferensya, observi ke todos mozos los djugadores de teatros en linguas maternel, tenemos los mezmos problemes. Problemes de lugar, problemes material i lo mas emportante problemes ke los mansevos no estan dando emportansa, seya a las linguas maternel, seya al arte, seya al teatro.
Syempre topi la kulpa en mozos los padres i las madres ma agora troki de idea. No ay kulpa, es la vida, la eksperiensya i la teknolojiya ke troko.
