Esta semana meldamos la perasha de Bear. En esta perasha mos embezamos las leyes de “Shemita”. Shemita es una ley muy emportante. Sesh anyos lavoramos la tierra i arekojemos la rekolta. El syeten anyo es el anyo de Shemita i es defendido de lavorar la tierra. La perasha mos embeza ke despues de syete anyos de Shemita vyene el anyo de Yovel. En este anyo todo torna a el empesijo.
En la perasha demanda la Ley santa una demanda muy emportante. Es muy klaro de no lavorar la tierra en el syeten anyo. Ma komo podemos mantenermos asta el anyo muevo? La ley santa mos avla de boka de El Todo Poderozo i dize ke va meter a la tierra en el sejen anyo la bendisyon i va abastar el mantenimiento fin a el mueven anyo. Esto es una garantia ke mos da El Todo Poderozo i es el sinyal ke la Ley santa es mandada de D-io. Porke ninguna persona no puede garantizar a el ombre mantenimiento de tres anyos.
Mos kontan los savyos ke un lavorador en un anyo ke no aviya bastante luvyas estava perkurando todo lo ke puede para azer en la tierra. Kuando vino el Shabat desho todo el lavoro i se fue a la kaza para tomar el dia Santo de Shabat. Akea noche El Todo Poderozo mando luvya para la tierra i la natura empeso su lavoro.
Esta chika konseja mos embeza una lisyon muy emportante. El ombre deve de azer todo para el mantenimiento i deve observar las leyes santas komo Shabat i otras. El Santo Bendicho El, kuando viene el tiempo, aze la parte suya i le da a el ombre el mantenimiento ke merese.
Las leyes de Shemita es un mamparo para el mantenimiento komo todas las leyes ke estan eskritas en la Ley santa.
