De muevo un personaje relatado al mez koryente, mez de Mayo i Madeleine Albright. Madeleine Albright troko syertas prejudisyas kuando fue nomada la primera mujer Sekretera de Estado de los Estados Unidos, el 23 de Enero de 1997. Unas kuantas semanas mas despues, a los 59 anyos, Madeleine deskuvryo ke sus djenitores, Josef i Anna (nasida Spiegelova) Korbelova, eran Djudios ke se konvirtyeron al katolisizmo en 1941 i bivyeron i kriaron una famiya kon la tradisyon katolika. Nunka avlaron de sus Djudaizmo.
Nasida el 15 de Mayo de 1937 komo Marie Jana Korbelova en Praga, Chekoslovakia, la famiya de la sekretera Albright se fuyeron a la Ingleterra en Marso de 1939, diez dias despues ke los Nazis okuparon su paiz. Despues de la Segunda Gerra Mundial, la famiya Korbel (nombre abreviyado de Korbelova) pasaron a Belgrad, Yugoslavia, ande Josef, su padre, tomo el posto de ambasador cheko en Yugoslavia. Para evitar el endoktrinamiento komunista en Belgrad, embiyaron a Marie a eskapar la eskola en Chexbres, Suisse, ande troko su nombre a Madeleine. El 11 de Noviembre de 1948, la famiya Korbel arivaron a los Estados Unidos, ande Josef topo un posto en la mueva fondada Nasyones Unidas. Los Korbel de muevo trokaron de sivdad i pasaron a Denver, Colorado, kuando Josef fue nomado profesor de siyensas politikas en la Universidad de Denver. (Entre sus estudiantes se topava la futura segunda mujer a ser Sekretera de Estado de los Estados Unidos, Condoleezza Rice).
Despues de estudiar en el al Wellesley College de Massachusetts kon una burs 100%, Madeleine se kazo kon Joseph Albright. Reusho a ekilibrar a su famiya engrandesyente myentres asistiya a la Universidad de Columbia en la sivdad de Nueva York, ande resivyo su doktorado en 1975. Antes de ser nomada Sekretera de Estado, Madeleine lavoro en diferentes universidades, formo parte del Konsejo de Seguridad Nasyonal i fue nomada Ambasadora de los Estados Unidos en las Nasyones Unidas.
Aunke la Secretera Albright empeso a oyer rumores sovre su erensya durante munchos anyos, konsentyo definitivamente i aksepto su erensya Djudia kuando los reporteros del Washington Post investigaron sus antesedentes poko despues de ser nominada komo Sekretara de Estado. La shokante novela tambyen revelo ke mas de dodje personas de su famiya, inkluidos tres avuelos, un tiyo, una tiya i un primo, muryeron en Auschwitz i Terezin. La investigasyon del Washington Post inkluyo el sertifikado de nasimyento de Josef Korbel, topado en los archivos del Ministeryo de Relasyones Eksteryores cheko, en el kual se identifikava komo Dudio. Ironikamente, la primera mensyon de la posibilidad de una erensya Djudia de Madeleine aparesyo en los peryodikos arabos ke sitavan manaderos anonimos. Empleyaron el “Djudaizmo” de Madeleine komo baza para atakar su nominasyon komo Sekretera de Estado. Anyos mas tadre, la sekretera Albright torno a Praga i eskrivyo sovre estas revelasyones en su livro de 2012, “Prague Winter” “invyerno de Prag”.
La sekretera Albright se konvirtyo al kristianizmo episkopal despues de su kazamyento en 1959, anyos antes de konoser su erensya Djudia. Una de las ijas de la sekretera Albright, ke se konsiderava episkopal asta las revelasyones de 1997, se kazo kon un ombre Djudio i esta engrandesyendo ijos Djudios.
