Kuando era chiko en el mez de Avril, despues de 23 Avril i antes de 19 Mayo antes ke se serren las eskolas, mos ivamos a los kampos para azer piknik porke despues ke viniya el fin del Mayo, mos ivamos a las kampanyas; a las izlas o a Caddebostan. Era una koza de ver los aparejos para ir al piknik. En vezes aziyan las madres kyoftes de kaza kon patatas fritas, al lado el piyaz, o en vezes se tomava del mezedji, sudjuk, salami, kashkaval, domates, pipinos i pimientones ke era akel tiyempo turfanda ke se diziya, ansi komiyamos en asentandomos ensima de las yervas kon un mantel ke se metiya en basho. Esto pensando ande mos ivamos para azer el piknik akeyos anyos. En vezez a Sultansuyu o a Chirchir, en vezes a Beykoz o si no a Polonezkoy. Pasavamos el diya entero. Los grandes djugavan tavli o si no kartas, las mujeres aziyan sohbet de aki de aya, los chikos djugavamos kon top ke diziyamos yakar top, las ijikas djugavan on do tura guzellik, en vezes djugavamos todos endjuntos sessiz filim. Las rizas ke riyiyamoz era de ver.
Kuando viniya las oras de komer, aparejavan las madres el pranso ensima del mantel ke se metiya en basho o si no en las mezas de tavla ke aviya en los kampos de piknik i komiyamoz kon gana buena. Los panes de antes eran okkali, no eran komo oy fafuryas. Las aguas inchiyamos de la fuente del lugar ande mos ivamos i eran muy savrozas porke viniyan a las fuentes de las montanyas ke aviya en el bodre del kazal. No mos artavamos de komer i bever. Despues de komer, kitavan las frutas ke se topava en akel tiempo. Despues del medyo diya kaji a las oras 5, kitavan las mujeres de los sakos borekas, boyikos, biskochos i gatós ke aparejavan de kaza. Ke savor ke teniya! Komiyamos kon chayiziko ke tomavamos del lugar ande mos fuimos.
Mas de esto en los piknikes aziyamos karne asada. Tomavan del kasap antrikot, pirzolas de kodrero, en vezes aviya en los kasapes bobrek i koch yumurtası, dalak ke se yama mersa, i en kaza aparejavan las mujeres las kyoftes kon sevoya i prishil; kon ke savor ke komiyamos. Kreyevos mas de 10 kilos de karnes tomavan por 10-12 personas ke ivamos al piknik. Agora si keremos azer ansina un piknik kale travar de la banka buen karar de kredi!
