Kada semana antes de empesar mi artikolo para el Şalom, me demando en ke estado estamos en el Medio Oriente. No savemos dainda si “Una Paz” se va realizar. Si los rehenes van a pueder tornar a sus tyerras sanos o muertos. Meldi en la gazeta ke toparon un ombre muerto el 7 de Octobre en la tomba de una mujer en Israel. Kada diya los Israelyanos estan topando las kadavras de syertos rehenes. No savemos mizmo lo ke es djusto o no. Ma kreo ke devemos de asperar dainda unas kuantas semanas para ver lo ke va afitar. Esto esperando ke la mas grande partida de estos esklavos Israelyanos tornen a sus kazas sanos i rezyos. Mismo si tornan sanos kreo ke van a bivir una perioda muy difisil de punto de vista psikolojika.
Ay unas kuantas semanas ke eskrivi en primero en el Amaneser, i dospues en turko en el Şalom ke el Muzeo Djudio esta organizando una ekspozision de Ketubas Otomanas i Turkas. Reelmente son muy presiozas. Ma malorozamente la mas grande partida de estas ketubas istorikas, pintadas i eskritas por un rabi i un pintor no se topan en Turkiya. Dainda ya puedemos topar syertas. Es por esta razon ke vos esto eskrivyendo en muestro semanario para topar ayudo. No se si el Israel Museum mos puede emprestar syertas ketubas ke tyenen en sus koleksyones. Vamos a eskrivir a la direksion del Muzeo para demandar. Vamos a ver la repuesta. Es en el 1989 ke topandome en Israel para una Konferensia sovre los Djudios del Imperio Otomano, tuve la posibilitad de vijitar la ekspozision realizada en el Israel Museum en Yerushalayim. Organizada por Esther Juhasz i Miriam Russo Katz (era orijinaria de Turkiya i ayudo bastante para esta ekspozision). Egzaminando el livro publikado para esta ekspozision vemos munchas ketubas pintadas en la partida “bodas”. Las ketubas son orijinarias de Estanbol, de Izmir i de Salonika i son echas entre los anyos 1830 i el empesijo de los anyos 1900.
Vos eskrivi ke puedesh embiyar la foto de la ketuba ke se topa en vuestra kaza kon whatsapp al numero +90 541 7678948 eskriviendo vuestro nombre. I devesh de saver ke esta ekspozision va topar lugar en el Schneidertempel i el Muzeo Djudio entre el 7 Novembre 2024 i el 17 Febrero 2025. Todas las ketubas van a ser aseguradas.
Dospues del primer artikolo, un amigo me embiyo las fotos de tres ketubas istorikas ke se topan en su kaza. Es bueno de empesar kon tres. Ay unas kuantas personas ke van a dar karar.
Esto yeno de esperansa. I espero ke va ser una ekspozision komo las “Megilas” ke realizimos unos kuantos anyos antes. Reelmente fue un grande sukseso.
