El diamante es la piedra la mas presioza del mundo. Su dureza, transparensia i su briyo no tiene igual. La primera referensia eskrita sovre los diamantes aparese en un manuskrito eskrito en sanskrito. Eskrive ke la klasa rika de India disfrutava de los diamantes desde el siglo IV antes de Kristo. Los antiguos gregos kreyian ke los diamantes eran fragmentos de estreyas o lagrimas de los Diozes. Kon el “kamino de seda” avian empesado las rutas komersiales i los diamantes empesaron a viajar desde las Indias a los paizes de Evropa. Asta el siglo XV, solo los reyes eran dinyos de yevar diamantes komo simbolo de la fuersa.
En los anyos 1400, el diamante empeso a ser popular komo ornamento de djoyas. Un talyador de diamantes enjeniozo, Lodewyk van Berchen, judio de Bruges, invento el “skaif”, una karucha ke lo rendio kapache de lavorar i azer munchas fasetas, kon presizion i simetria en angulos ke refletan la luz en los diamantes. Este “skaif” transformo la industria de diamantes. Avrio la puerta a la kreasion de diferentes kurtos komplekses. En 1475, el dezinyó el primer diamante en forma de pera. Oy en mizmo, el “skaif” kontinua a uzarse en esta industria para krear munchas fasetas en los diamantes. Una statua de bronzo fue instalada en Antwerb, Belchika, para komemorar su grande kontribusion por su lavoro metikulozo, su dizenyo revolusionario i su korte ekselente de munchas fasetas.
Esta invension de Van Brechen, revolusiono la industria de diamantes i pujo su popularidad. Munchos judios tayadores de diamantes ke bivian en el tiempo de la Inkizisyon en Espanya, se refujiaron en Amsterdam yevando kon eyos sus savidurias i fortunas. En 1579, la Ollanda se avia liberado de la Espanya. Despues de esta liberasion, avia un ambiante avierto i tolerante i el siglo XVII fue una “perioda de oro” para Amsterdam. Se izo una de las sivdades las mas rikas del mundo, el prinsipal puerto komersial de Evropa i el sentro finansiero el mas importante del mundo.
Asi la istoria de Amsterdam kon los diamantes, empeso a floreser kon los judios. Ma malorozamente, kon la segunda gerra mundial la situasion entro en kriza i munchos lavorantes i tayadores judios tuvieron un destino muy leshos del briyo de diamantes. Desaperesieron mas de 2000 tayadores judios en los kampos de Alemanya i Polonya.
La industria de diamantes en Israel empeso en 1937, en Petah Tikva, antes de la Deklarasion de Independensia. En 1947, se kreo la Borsa Israeliana de Diamantes. Oy en dia la Borsa de diamantes es la tresera del mundo.
El diamante es la gema la mas presioza del mundo, ma su kompozision es simple, son molekulas de karbon. Kon la fuersa de la kalor i de la presion, el karbon fue transformado en diamante. Entre el karbon i el diamante ay un largo kamino de perfeksionamento. Komo es una prosedura bastante difisil para ke alkanse la luz i el briyo, el diamante fue komparado kon la maturidad de la persona. El ombre pasa siertas difikultades en la vida ke pueden ser oportunidades para aprender i kreser. Es un grande koraje de ver sus defektos i luchar para enkontrar su briyo i su paz interior. Todos kererian ser un diamante, ma pokos son dispuestos a ser polisados.
Baal Shem Tov, rabino filozofo komparo el puevlo judio a un diamante: “Komo un diamante nesesita a ser polisado antes ke briye, kada persona deve de lavorar para dar luz a su diamante interior i desharlo ke briye”.
