En el empesijo de esta semana, el prezidente de la Republika de Iran, Reisi i otros kuatro miembros del governo muryeron en un aksidente de helikopter. Despues ke inoguraron un baraj en Azerbaydjan, en tornando kon helikopter, aviya tanto bruma ke el helikopter kayo i todos peryeron sus vidas. Las televizyones mos amostraron ande kayo el helikopter, de verdad ke no se viya “ojo kon ojo”.
En viendo estas imajenes, me vino al tino un rekuerdo de antes munchos anyos. Una demanyana, kaliya ke me fuera a Hasköy. Los dolmushes se alevantavan de la punta de Sarı Madam. Moravamos en Bankalar Caddesi, suvi a la plasa de Shishhane, kuando arivi a la punta de Frej Han, yo ke veyo: una bruma muy fuerte, tanto ke no estava puedyendo ver ni mis piezes. Estava delantre de Frej Han, me dishe los dolmushes se topan djusto en frente. En kaminando derecha derecha va arivar aya. De otra parte me estava espantando del trafik, ke no me tope debasho de un otomobil o otobüs. Kurto, ampesi a kaminar derecha derecha sin aboltarme. Esto kaminando ma no se esta eskapando el kamino. Ya era tiempo ke me topara delantre de los dolmushes. Kamina ke kamina, ampesó a alivyanarse la bruma. Kuando ya ampesi a ver a mi doredor, yo ke veyo? Esto delantre de “Altıncı Daire”. Para los ke no konosen por akeyas partes, va eksplikar ke al lugar de irme derecha derecha, me fui diagonalmente. I ke iva azer? Komo iva tornar aryentro de la bruma de muevo? Ampesi a segir en apegandome a los apartamentos. Ya arivi a los dolmushes. Akel tiempo los dolmushes teniyan tres rangos de siyas. Ya se incho el dolmush ama kómo mos vamos a ir? El shofor se estava espantando i siguro mozotros tambien. A la fin avriyeron la puerta de delantre de al lado del shoför i el ke estava asentado aya, kito el pie afuera i pizo al bodre del trotuar. El estava dirijando el oto, en dizyendo mas para la derecha, mas para la siedra. El shoför estava konduizando muy muy avagar. Yo estava arogando de aryentro mi korason en dizyendo “Shema Israel, shema Israel”. Ansina ansina arivimos a Hasköy. Kuando abashimos tomimos un reflo profundo. En dando loores al Dio ke mos ayudo en este viyaje.
