Kuando mos fuimos a Espanya, no kijimos tornar sin vijitar Toledo. Toledo es situada enriva de una montanya, i es rodeada por el riyo Taho. En la Edad Media, kuando Espanya estava debasho del kontrol muzulmano, Toledo fue la sivdad de las tres relijyones, todos bivyendo endjuntos en paz i en armoniya. Oy, kada anyo, miles de turistos estan vinyendo para vijitar los monumentos i las estrukturas antiguas ke sovrebivyeron.
Seguramente, lo ke mos entereso lo mas fue la Juderia. Los tres diferentes karties de la tres relijones empesan en la famoza Plaza de Zokodover, el sentro de la sivdad ke era el lugar de reunion. Entrimos a las kayes estrechas de La Juderiya por la Puerta de Assulka, ke esta serka del merkado de pulgas ande se vendiya azete, manteka, garvansos, lentejas i todo lo ke era menester por la vida kotidiana. La kaye prensipal se yama Kaye del Marmol i konekta la Juderia kon el resto de la sivdad.
Ay otro merkado, ande ay lugares para orasyones, banyos publikos, ornos de pan, palasios i una pared. Serka del rio Tajo, aviya el Barrio del Degoyadero, yamado ansina porke aki se sakrifikavan las vakas kon el ritual judyo.
En el Barrio de Hamazelt, biviyan las famiyas judias las mas rikas, i en la kaye San Juan de Dios, biviya el judyo el mas konosido de Toledo: Samuel ha-Levi. El era el trezorero del rey Pedro de Castilla i le ordeno al rey de konstruir una grande sinagoga, Sinagoga de El Transito. Oy, esta Sinagoga es konservada komo muzeo sefaradi. Samuel Ha-Levi, era el proprietario de la kaza ke agora es el Museo del Greco. El nombre orijinal era la Sinagoga de Samuel ha-Levi. La chika Sinagoga, la Sinagoga de Yosef ben Shoshan, ke era el nombre orijinal de lo ke se konvertio oy a la iglezia de Santa Maria la Blanka, se konstruyo debasho del reynado de Alfonso VIII. (Debasho del reynado de Alfonso VIII, todos biviyan en armonia). Antes, todos los viernes, un rabino sonava tres vezes el shofar para anonsar el Shabat.
En akeyos dias, aviya dodje Sinagogas en la Juderia i serka de kada Sinagoga aviya un banyo suterano yamado mikve. Los arkitektos muzulmanes konstruiyan las Sinagogas, las Eglizyas i las Mishkitas.
Entre las dos Sinagogas, puedesh ver la kaza de un judio riko, el judio Izak, ke finanso el viyaje de Kristof Kolomb. Izak aviya emprestado las paras a Izabel i Fernando por el viyaje. Los proprietarios de las kazas judias teniyan mikves debasho sus kazas.
Kaminando por las kalejas de la Juderia, enriva de las piedras de en basho, ay eskrituryas en ebreo. Disheron ke ay trezyentos sinyos enriva de estas piedras: la Menora, la Estraya de David, i Hay (el biervo ebreo por Vida).
En los anyos 1486-1492, la Plaza de Zokodover en Toledo, fue el lugar de la inkizision. Tomas de Torquemada, el Grande inkizitor de Espanya, kon sus manos kemo kinyentos judios en este lugar, i emprizono munchos otros. En el Muzeo de la Tortura estan egzibitados los artefaktos de esta perioda obskura de Espanya.
