En tornando del echo me izo telefon mi kerida mujer me i disho ke a la noche vamos a komer avaz kon arroz, si keres trayemos un poko de trushi. Me pensi, despues de esta komida halva se va bueno. Por esto entri al charshi de Erenkoy. En kaminando en las kayes del charshi me vino a los ojos el charshi de mi chikes en Feriköy ande moravamos. Aviya balukchis, dos o tres deyos lado kon lado o uno en frente del otro. Ke rikeza de pishkados ke aviya. La Palamida, el Chinakop, el Lüfer, el Mezgit, si dizes el Kalkan kada uno, el mas chiko era 3 o 4 kilos. Las Sarvidyas era el boy de kaji de chinakop. El pishkado Kırlangıç se enkolgava de las alas en el tepe de los tezgahes komo statuas. Kada Balukchi vendiya garatos, likorinos i chiroz aryento de una vitrina ke se topava allado de la puerta. Mas de esto, friyiyan midyas kayentes kayentes yevavan a la kaza, en asperando, komiyan un sandvich de midya i ensima metiyan la sos tarator. Delantre de los balukchis se topavan las arabas ke vendiyan salatas. Los ke tomavan el pishkado, de aya merkavan la salata vedre kon sevoya freska, roka i ravanikos kolorados. En el charshi se topava unos kuntos mezedjis. No aviya munchos mezelikes. Mas muncho vendiyan kezo blanko, kashkaval, salamis, sudjukes i tambiyen pasturmas ke se enkolgavan del tavan abasho kon espangos. En el frijider se topava la salata de berenjena, haydari, tarama i la salat Rus. Ke djips ke tomavamos del mezedji. Delantre de los mezedjis aryento de un kuti de tavla vendiyan Topik, porke moravan munchos Ermenis en Ferikoy i Kurtulush i es la spesyalite de los Ermenis. Aviya botikas ke vendiyan Trushi. En kaminando viyamos el orno de pan. Al lado Pasteleriya, mas de esto aviya djigerdjis ke vendiyan ligado, meoyo, aluenga, ishkembe i korason de kodrero. Las botikas ke vendiyan fruta seka, las oras ke tornan los ombres a kaza empesavan azer los leblebis ke saliya una golor maraviyoza. No aviya akel tiempo merkados grandes. Si aviya bile era unos kuantos deyos. Mas muncho de los merkados aviya bakkales. En el charshi se topava kuyumdjis, botikas ke vendiyan charukas, botikas ke vendiyan kalsados i unos kuantos konfeksyondjus, tuhafiyedjis i nalbures. Kuando pasavas de al lado de los manaves, gritavan para travarte aryento i venderte frutas. Ke rikeza era de ver estos botikas. Los esnafes konosiyan a los ke estan pasando de al lado de las botikas; te davan saludes i te pruntavan el hatir de komo estas. Malorozamente agora no kedo ni charshis komo vos konti ni vendedores komo antes. Si no me esto yerrando solo ay en Kadikoy, i en Beshiktash este modos de charshis.
