Esta foto fue tomada de la estasyon enternasyonal del espasyo por un astronoto en el anyo 2022. La foto mos amostra la kaldera del volkan ke esta en la montanya Nemrud de la rejyon del lago Van en el kazal ke se yama Tatvan. Una parte del Yin-Yang es un lago i la otra parte es formada por las lavas solidifikadas del volkan. Este volkan esta en una montanya de una altitud de 2900 metros i la dalkavo erupsyon ke tuvo, afito en el anyo 1650. En la kaldera ke es la boka del volkan, el lago esta yeno de agua dulse okupando una superfisye de 12 kilometros kuadrados i tyene una pronfundidad de 176 metros. Al lado de este lago ay un otro muncho mas chiko ama kon agua muy kayente i profundo de 11 metros. Esto mos amostra ke mizmo ke el volkan esta apagado, ay una vida aktiva debasho de la kaldera. La foto mos amostra el lago del krater.
Es ke en Turkiya tenemos dos montanyas de mizmo nombre dedikados al rey Nimrod. La otra montanya esta en la rejyon de los Komagenes entre Adıyaman i Malatya. En la sima de la montanya ay dos templos. El uno mira al Este, ande sale el sol, el otro mira al Oeste ande se echa el sol. En kada uno de estos templos, se ven kavesas enormes de eroes de la mitolojiya grega konfundidos kon los dyoses de Persya. Estas kavesas kayeron de las estatuas ke estavan asentadas en tronos despues de un gran rash.
Eskrivyendo Yin Yang en Turkiya, kije amostrar la asemejansya entre la foto de ariva i el simbolo ke se yama Yin Yang. Un simbolo de la filozofiya de China ke mos amostra el dualizmo, la lucha entre las kontradiksyones i el ekilibriyo para formar la armonia vital.
Fuente: Jurnal de Syensyas 2020, Harry Baker.
