Antes una semana estavamos todos en la sinagoga de Neve Shalom para fiestar dos kozas maraviyozas. Demanyana en la Tefila, una seremonia para los elevos de Bar Mitsva ke kumplieron el primer anyo de sus estudyos. I a la tadre una seremoniya maraviyoza de Bat Mitsva ke las ijas de este anyo kumplieron los estudyos i selebraron sus Bat Mitsva. En kaminando kon los padres en el koridor de la sinagoga, todos estavamos rogando para eyas i para todas las kreaturas de Yisrael todo boeno.
En mirando esta fotografia muy valutoza, me akodri kuando era chiko i kuando estava en İzmir, la seremonia de Bat Mitsva ke felisitavamos antes muncho tiempo. Kuando estava lavorando komo profesor de Ebreo en la eskola Judia de Izmir, unas kuantas vezes ya preparimos ijas para Bat Mitsva. Ma la savor mas ermoza era kuando preparavan muncho antes serka la fiesta de Shavuot ijas para Bat Mitsva.
Me akodro ke el More Shemuel AKohen, de bindicha memorya, i los ermanos de Diyas ke eran Hazanes unas kuantas vezes ambezaron para Bat Mitsva. Muestras amigas vistidas de blanko en la teva meldaron pasajes de la Tora kon una melodia tradisyonal. Despues meldaron pasajes de la Tefila i alkavo kada una disho unas kuantas palavras por este dia.
Mis elevas tambien mas tadre selebraron sus Bat Mitsva. Meldando unos pasajes de el TaNaH, kantando kantigas, disheron palavras valutozas para todos. Estas seremonias eran muy ermozas; munchos mos emosyonavamos ke estas ijas se van a azer madres Judias i van a fraguar kazas Judias muevas.
Rogamos ke muestros ijas i ijos ke estan en esta edad de Bar i Bat Mitsva se agan personas de boena ventura i ke fraguen el futuro Judio de el mundo, amen.
