Despues de syete semanas de Omer ayegamos a la fiesta de Shavuot. Ke en este dia resivimos la Ley santa de la mano de el Todo Poderozo en el monte de Sinay. En el sesh de el mez de Sivan, todos estavamos prontos para este kazamyento. La Ley santa vino komo una novya i kon eya mos trusho un ashugar maraviyozo. Sheshentas i tredje mitsvot para estudyar, embezar, guadrar i aplikar.
Los ijos de Yisrael ke estavan prontos para este dia le dieron a el Todo Poderozo dos palavras muy emportantes. Naase ve nishma. Antes de todo aplikar las mitsvot o estudyarlas. Esto mos akodra la ovligasyon de pratikar las mitsvot para guadrar el Judaizmo.
Los tres padres de Yisrael ke son Avraam, Yitshak i Yaakov mos trayen tres kozas muy emportantes. Avraam mos ambeza el “hesed” ke es “mersed”. Los ijos de Yisrael aplikan este doktrino en azyendo “gemilut hasadim”, ke es aktos de byenfezensya. Yitshal mos ambeza la “avoda” ke es servimiento. En el tiempo de el Bet Amikdash, teniamos los korbanot ma oy en lugar de esto tenemos las Tefilot, ke son las orasyones. I tambien Yaakov mos traye el doktrino de estudyar la Ley santa. En las orasyones meldamos la ley komo la perasha de la semana. Ma esto no abasta. Devemos de estudyar i embezar la Ley porke esto es el mamparo muy grande para mozotros.
En la fiesta de Shavuot meldamos siertas kozas. La Megila de Rut ke es la istorya de una prensesa de Moav ke se konvertiyo a el Judaismo. Rut es una de los avuelos de David, rey de Yisrael. La tradision mos ambeza ke David mos desho la vida boena en Shavuot i en esta fiesta meldamos la istorya de Rut. Tambien esta istorya era pasada en el tiempo ke fiestamos Shavuot.
Orta koza ke meldamos es La Ketuba de La Ley. Komo kada kazamyento ke tyene Ketuba, el kazamyento de Yisrael kon la Ley santa tambien tyene Ketuba. Me enkanta de meldar la Ketuba de la Ley en Judeo Espanyol eskrita por Rabi David Pardo.
En ougurando una fiesta alegre kon salud, pas, repozo, ganansya, enveranada boena para todos, kero eskrivir unas kuantas linyas de la Ketuba.
En este dia abashó el D.io Baruh U en Sinay i milaryas de malahim kon El
A dar la Ley a su puevlo, kaza de Yisrael
Por mano de Moshe Rabenu, pastor fiel.
Hag sameah
