El 13 de Junio vamos a resivir en muestro Sentro, al Sinyor Manuel Galvez Ibanez de Espanya ke eskrivyo un livro en Judeo-Espanyol “El Espanyol Sefardi”. Es un livro de istoria. Mos vamos a reunir a las 15.30. I vamos a tener la posibilidad de estar endjuntos kon Manuel Galvez. Este diya vash a pueder merkar el livro tambien.
Para mozotros, El Sentro Sefardi de Estanbol, es un dover de realizar enkontros asemejantes. Los ke keren partisipar deven de telefonar al 0212-2404144 i dar sus nombres a la sinyora Doli, i vinir el 13 de Junio a lo mas tadre a las 15.30.
Oy en diya no es muy fasil de publikar livros. Reelmente esta muy karo. Un livro ke imprimamos 1.000 deyos; semos kapaches de venderlos a lo manko en 7 o 8 anyos. Por esta razon para ser una kaza de publikasion tenemos de menester de un kapital bastante emportante.
En muestro muzeo estamos prontos para publikar un livro sovre las komidas de Çanakkale. Lo vamos a publikar kon el apoyo del Sentro Sefaradi de Estanbol i el Semanaryo Şalom.
Vos kero avlar del Muzeo Djudio de Estanbol. Dospues del 7 Oktobre 2023, pasimos una perioda reelmente muy difisil. No puedemos dizir ke oy en diya estamos bivyendo en las maraviyas. Ma komo muestro payiz i Estanbol, los primeros 3-4 mezes de este anyo resivio bastante turistos i muestro muzeo resivyo bastantes vijitadores de su parte. Los dirijentes de un muzeo son orozos kuando resiven bastantes vijitadores. Para mozotros, lo ke ganamoz no es tan emportante. Semos orozos kuando una eskola esta vijitando el muzeo kon 50 o 60 elevos. Puedemos ganar esta suma kon 15 turistos. Kada diya kon grande pasensia aspero ke me embiyen el rezultado del diya. A la fin del mez esto vyendo el rezultado del mez entero. I este mez fue bastante reushido.
Avlando del Muzeo vos kero akodrar la Ekspozisyon sovre las Ketubas Otomanas i Turkas ke vamos a realizar en el Schneidertempel del 7 al 17 Novembre 2024; i dospues en muestro muzeo. Si posedash syertas ketubas publikadas o kompletamente eskritas i pintadas a la mano, devesh de embiyar la foto de esta ketuba al numero de telefon: +90 541 767 8948 eskrivyendo vuestro nombre. Espero ke vamos a reushir de eksposar bastantes ketubas.
