Meksiko elijio su primera mujer prezidenta. Claudia Sheinbaum es la primera prezidenta judia i la primera mujer prezidenta de Meksiko.
El alkalde judio viejo de la Sivdad de Meksiko fue seleksionado por el partido governante del paiz para adresarse para el kargo el anyo pasado.
Los rezultados de las eleksiones de Alhad amostro ke el personaje de 61 anyos obtuvo entre el 58 i el 60 por sien de los votos.
Sheinbaum gano kon una diferensia de kaji 30 por sien sovre su prensipal rival, la mujer de echo Xóchitl Gálvez.
La ganadora prezidental del Partido Morena va ramplasar el viejo prezidente, Andrés Manuel López Obrador el 1 de oktobre.
En avlando, despues ke se deklaro el rezultado, Sheinbaum disho a los elektores: “No vos va deziluzionar". Sheinbaum, la sientifika enerjetika, esta desidada a aprovecharse de los "progresos" realizados por el viejo prezidente, Obrador.
En el anyo 2000, Sheinbaum fue elijida komo alkaldesa de la kapital.
En el anyo 2015, eya fue elejida komo la prensipal de la munisipalidad de Tlalpan, el distrikto el mas grande de Meksiko.
Tres anyos despues, Sheinbaum fue elejida para egzekutir una misyon de sesh anyos komo el prensipal de la munisipalidad de la Sivdad de Meksiko, probablamente el segundo kargo el mas emportante en la politika meksikana, siendo la primera persona judia a okupar este kargo.
Sheinbaum, una judia sekular, disho ke esta orgulyoza de sus orijines judios i disho ke selebra “todas las fiestas judias” en la kaza de su nono i nona. Durante la kampanya, se enfrento kon la enformasion yerrada en los derredores sosiales ke kitaron rumores dizyendo inkorrektamente, ke eya nasio en Bulgaria, una akuzasion ke sus partidarios kalifikaron komo antisemitizmo.
El padre i madre de Sheinbaum la kriaron en un kaza judia i segun las enformasiones, eya avlava yidish i komiya komida ashenazi kuando era chika. Su segundo marido, kon ken se kazo en noviembre, se yama Jesús María Tarriba.
Sheinbaum evito de avlar de Israel i Palestina durante la kampanya elektoral. Ma, en enero del anyo 2009, kuando Israel estava gerreyando en Gaza, eya sito su orijin judio en una letra ke aviya eskrito a un periodiko meksikano.
“Por mi orijin judio, por mi amor a Meksiko i porke so sivdadina del mundo, esto partajando kon miliones el dezeo de djustisia, igualdad, fraternidad i paz".
