La intelijensya artifisial ampeso a entrar en muestra vida, en estos tiempos dalkavos. Se ampeso a utilizar en las endustriyas i en las aplikasyones de kada diya. En primero estavan esperando ke esta aplikasyon ayude al mundo de eskapar una ora mas presto los kuentos o los echos de buro. Agora ampeso a ayudarmos en las analizes entrifikadas, konoser figuras i karas. Puede diagnostikar i melizinar siertas hazinuras, puede analizar los riskos en el sektor de finans. Ma aparte de las oportunidadas ke mos ofre esta teknolojiya, tambien se deve de tener en kuento su uzo etiko.
Ya esta muy bueno esto todo. Lo alavan i lo alavan a esta intelijensya artifisyal ma se olvidan esto: Ken envento esta intelijensya? Siguro ke ia intelijensya umana. Esta intelijensya artifisyal mos esta dominando. Amanyana al otro diya, muestro frijider mos va dizir, oy no komas esto, kome akeyo. Mos puede dizir, ayer komites muncho dulse, oy kome una omlet kon kezo.
Estan fabrikando robotes. Estos robotes los izieron en forma de perros, de personas i mizmo de kavayos. Kuando meldi ke izieron kavayos artifisieles me vino al tino de uzarlos en Büyükada. Aya alevantaron los faytones porke los kavayos estavan lavorando muncho i los poveretikos se estavan muryendo debasho del solero de enverano en akarreyando un alay de turistos ke no aviya fin. Ansina puedemos ver hayre de estos kavayos ke no se kansan i no se mueren. Puedeser ke se mete de vez en kuando un poko de azete de makina i kontinua su kamino.
Los ke estan solos se merkan robotes en forma de personas para tener un bafo en kaza i azer un poko de moabet. Ma estos no tienen alma ni tienen sentimiento. Ke kadar de moabet pueden tener no entyendo. No entienden de shakas. Porke no aferran el punto komik de lo ke se avla.
Agora kuando se avla de robotes me viene un espanto. Estos robotes algun diya pueden ser danjorozos para mozotros, los umanos. Me viene al tino el GOLEM, ke es el primer robot del mundo. Ya devesh de konoser la istorya, ma yene vos kero azer un rezume.
En el 17en siglo, en la Chekoslovakia, en Prag, aviya muncho antisemitizmo. Moravan munchos judios aya. Un haham, Yuda Loew Ben Bezalel izo un robot de tierra (kil) ke lo yamo Golem. Este Golem era jigante i lo izo para ke defenda el puevlo judio. En la frente teniya las letras ebreas “alef, mem, tav”, keriya dizir Emet, verdad. Era defendido ke Golem lavore en diya de Shabat. El haham, kada viernes le kitava la letra alef de su frente, ansina le kedava solo el biervo met ke kere dizir muerte. Golem kedava sin meneyarse durante Shabat entero. Un diya el haham se olvido de kitarle la alef, Golem se kedo sin kontrol i ampeso a derokar todo i azer danyo a las personas. Sovre esto le kitaron todas las letras de la frente, Golem se dezgozno i se izo pedasos. Dizen ke sus pedasos estan guadrados en una kamareta sekreta, debasho de la sinagoga Altneu en Prag.
Por esto es ke me espanto no se dezmodren algun diya estos robotes i mos azen danyo al lugar de plazer.
