Dr. Selim Salti / Israel
Es difisil de espartirse de una alma kerida, sovre todo de Matilda, reyna del ladino, persona ke para todos mozotros fue un egzemplo de amor i de devosyon por muestra lingua. Toda su vida peno i lazdro por el sefaradizmo, su lingua, su kultura, su folklor, su muzika, su kuzina i mas. Inimajinavle la kantitad de livros ke eskrivyo, porke kijo ke la lingua i la istorya kultural no se deperda. Eya será la unika persona de muestro tiempo ke supo arekojer lo poko de tradisyon orala ke tenemos.
En desparte, fue una de las ke lavoraron kon insistensya para sovreguardar la tradisyon sefaradí ke resivyo de sus paryentes en Milano onde nasyo. No puedemos olvidarmos de Matilda, porke eya anyos enteros paso su vida a eskrivir, a dar lisiones, a mirar de arekojer a su doredor los amantes del ladino.
No me va nunka olvidar kon ke ardor durante 12 anyos kolavoro kon mi para el Salon Ladino. Ansi fuimos los primeros a poder tener una alta asistensya de miembros ke una vez al mez veniyan a oyer konferensyas en ladino, i komer al uzo sefaradí.
Matilda fue una esposa remarkavle, madre de 2 ijas i de un ijo, kon 14 inyetos i 8 bizinyetos. Ke el Todo Poderozo les de buenas i largas vidas ke se akodren de esta nona, esta persona unika ke onoramos todos en Israel i a traverso el mundo.
Matilda fue para mi una ermana kon la kuala partaji lavoros en diferentes kampos de la kultura, koza ke me mankara i ke me atrista de peryerla. Ke su alma deskanse en paz.
Baruh Dayan Haemet.
