Es de muevo un diya de Shabat ke Israel reusho a salvar 4 de los rehenes ke estavan mas de ocho mezes en las manos de los militanes del Hamas. No se mas kuantos son los ke biven dainda i ke son sanos dainda en las manos de los militanes del Hamas. Ma fue un mirakolo estas salvasiones. Kon grande koraje entraron en una sivdad; ma savian ande se topavan estos kuatros rehenes. Una partida de los gerreadores israelyanos entraron a esta sivdad komo refujyados palestinianos. Grande plano militar i buen koraje. Esto kontente de ver ke 4 esklavos fueron liberados. Ma reelmente el resiproko fue atristante. Se dize ke 210 palestinianos fueron matados. No se si todos eran siviles o si una partida eran militanes? I se dize ke 400 personas fueron feridos. Una situasion bastante difisil.
El governo Israelyano i Netanyahu son en una situasion bastante problematika. Mizmo si dyeron karar de azer la gerra fina la fin, esto no va ser muy kolay. No esto entendyendo si el puevlo esta kontente de esta situasion. Kada noche de alhad en Tel Aviv una grande partida de los sivdadinos de esta sivdad estan protestando la politika del governo aktual. Una partida de estas personas estan kontra la gerra. Otros tyenen diferentes ideas politikas. De la otra vanda una partida del puevlo esta apresiando la politika de Netanyahu.
Esto rogando para ke esta situasion tope fin. I ke todos los esklavos tornen sanos. No va dizir i rezios, porke van a tornar en una negra situasion. Kreo ke tyenen munchos problemes psikolojikos. I van a ser tratados por los doktores i los psikologos. Mizmo los ke reusheron a salvarsen el 7 de Oktobre dainda estan kon psikologos i malorozamente no tornaron a sus situasion del 6 de Oktobre.
Es djusto ke Israel es un payiz de mirakolos i los israelyanos reushen a rezolver munchos problemes. Espero ke a la fin mizmo este problem va ser rezolvado…
