Oy voz kero azer un poko de nostaljiya de mi chikez kuando mos ivamos a los banyos ke se yamavan Hamam. Kuando teniya 7-8 anyos, mi madre, ke este en ganeden, me yevava al Banyo de Pangaltı. Diya de Viernes, despues del medio dia, kuando tornava de la eskola, en primero aziya la validjika. Metiya aryento chamashires i tambien vistimyentas limpyas. En kaminando moz ivamoz porke moravamos en Ferikoy ke era serka del banyo de Pangaltı. En vezes, moz ivamos kon los vizinos. En entrando al banyo, mos davan kamareta. Mos dezmudavamos i mos metiyamos PİSHTEMALes ensima i a los piyezes charukas de banyo, ke se yamavan TAKUNYA. Ansi entravamos al banyo. En primero mos asentavamos o mos echavamos en el “GÖBEK TASHİ” para sudar. En echando aya aziyan un poko de sohbet de aki de aya kon loz vizinos. Despues ke sudimos buen karar, pasavamos al lado de las fuentes ke se yamavan “KURNA” i mi madre me lavava en primero la kavesa 3 vezes i despues me enshavonava el puerpo. I kon TAS me echava ensima aguas buen karar. En primero la agua era kayente i yo gritava porke era kayente i me kemava, despues avagar avagar se aziya mas yelada la agua. Despues ke me lavava a mi, se enshavonava eya. Despues ke se lavava, se echava aguas ensima i se ferahladeyava. En salyendo en primero entravamos a la primera kamareta para trokar los peshtemales, despues a la sigunda kamareta para uzar el puerpo al yelado i en fin entravamos a la kamareta ke mos dieron en entrando al banyo. Mi madre tomava gazoz yelado i me dava, a mi me plaziya muncho el gazoz ke beviya en salyendo del banyo. En vezes, trayiyan biskochos o borekas i komiyamos kon chay en salyendo. Un anyo despues ke me yevo mi madre otruna vez al banyo, disheron las personas de aya, este ijiko ya se izo grande mas no lo traygas! Despues de akel diya empesi a irme en vezes kon mi padre, ke este en ganeden. O al banyo de Pangalti o al banyo de Galatasaray. Porke el echo era en el Tünel, ya konosesh todos la botika Horozlu. Dava vistimyentas de boda, komo frak, bonjur i smoking. Siguramente kon los chapeyos silendros ke era moda en akeyos anyos. Kuando mos ivamos kon mi padre, el rituel era un poko mas diferente. Por egzempyo, kuando mos echavamos ensima del göbek tashi mos aziyan “KESE” i un poko de masaj. I despues el ke mos aziya kese mos lavava. Teniya en la mano una enshavonadera komo la kola del kavayo. Komo se aziya el shavon no vos puedesh imajinar. Mos aziyamos komo “ombre d e inyeve”. En salyendo i kon el mezmo beviyamos Gazoz yelado. Antes me akodro a las novyas, antes de la boda la yevavan al banyo i se diziya, Banyo de Novya. Este filmo en supito me paso delantre los ojos ayer en salyendo de la dush ke me ize en kaza. Vos kije kontar i a vozotros esta nostaljiya. “Sıhhatler olsun” a todos los ke meldaron esta eskriturya.
