Estava sintyendo un teatro en la radio esefarad de Esther Cohen i Ruben Tevah “la mujer sufu”. Avlando sovre sus vidas despues ke se kazaron i se bolaron los ijikos a sus kazas. Kedaron solos, en una kaza grande. En el teatro el marido le dize: un tyempo kuando estavan los ijos en kaza teniyas muncha lavor. Agora ke estamos, tu i yo kara de flor, kualo es ke azes diya entero. Una komidika, dos kamikas, para lavar tyenes makina…bla…bla... Vos rekomendo de avrir estos teatros en spotify o en esefarad/radio, debasho de “pujados i no menguados”. Kozas de riyir kon unas kansiones muy savrozas.
En este punto le dishe a mi marido, “na, agora mozos.” El ijo se fue a una vanda del mundo i la ija a otra vanda, solo las kozas ke no pudyeron yevar kon eyos kedaron kon mozos. Alevanta, alimpya, topa lugar, enderecha i pensa ke van a tomar un diya.
Me esto pensando de las fiestas ke pasimos. Mezas largas, manteles kolalis, aparejar pransos, djente, famiyas, ermano kon las kreaturas… Agora i eyos tyenen famiyas largas. Se kazaron, tyenen sus bebes. Por esta razon se va meter en otras kazas, otros pransos. Kedimos tu i yo kara de flor. Ansina disho en el teatro Mme. Cohen. Verdad esto mirando al deredor ay munchas famiyas semejantes. La komunita se esta enchikesyendo. Kada vente anyos vyene una furtuna, troka las vidas. En Edirne munchas famiyas kon una ola se fueron a Estambol o, a otros paizes. Mi famiya, mi padre era de Galipo. No ay ken bive aya de los djudyos. Solo las memoryas. Afilu fotos bile no tengo de mi papa sovre la vida de aya porke i el vino chiko a Estambol. En esta furtuna me apersivi ke tengo muncha barana. Munchos chinis, munchos findjanes de kafe, munchos elementos de mupak, kualo se va azer esto todo? Kale enchikeser i dar ferahlik a las kazas. Kale topar diferentes yugos para estar en pyes.
Keridos lektores. Ya se ke esta kestyon es semejante para munchas famiyas. Sanedad i haberes buenos, esto es de arogar. Shavuot Alegre kon leche i miel, pas al mundo i haberes buenos.
