La Juderia de Cordoba, es la zona de la sivdad espanyola de Cordoba ande bivieron los judios entre los siglos X - XV. Es situada en el Sentro Istoriko de Cordoba, en el nord-este de la Meshkita Katedral. Es una de las zonas la mas muncho vijitadas por los turistos. Se puede ver monumentos komo la Sinagoga, el Zoko Munisipal i el Muzeo Taurino. El sentro istoriko de Cordoba fue nombrado Patrimonio de la Umanidad por UNESCO en 1994.
En una epoka, los tres puevlos (kristiano, judio i muzulmano) bivieron endjuntos. La populasion no muzulmana bivía sometida a la ley islamika i los judios tenian sus propio sistem judisial. Durante esta perioda, la majorita del puevlo judio biviya debasho del dominio del Islam. Kaminando por la Juderia, el turisto puede ver, oy en dia, una manyifika statua de bronz dedikada a Maimonides, el grande filozofiko i mediko judio.
La Sinagoga de Cordoba, konstruida en 1315, es un edifisio istoriko en el barrio judio de Cordoba. Siendo una sinagoga chika, mos aze pensar ke era la sinagoga privada de un ombre riko. Tambien ay una yeshiva, i una sala de estudio. Otra posibilidad es ke los komersantes aviyan konvertido una de las salas de lavoro en una sinagoga. La sinagoga fue dekorada segun la mijor arshitektura gotika i islamika.
Cordoba djuga un rolo emportante en la istoria de la vida judia en la Edad Media. En el siglo X, Cordoba fue el sentro del intelekto i de la kultura judia. Esto fue el rezultado de las reushitas de un ombre, Hasdai Ibn Shaprut (915-970). Mediko, diplomatiko i intelektual, Hazdai servio en los kortes del kalifa Abd al-Rahman III i su suksesor Hakam II. Su kapachidad influenso la komunidad judia. Hazdai estava anturado por poetas, filozofos i savios judios.
Hasdai no neglijo tambien el estudio de la ley. Establisio una akademia para el estudio del Talmud en Cordoba i merko tambien kopias del Talmud de las komunidades babilonikas. Debasho de la direksion de Moshe ben Janoch, la akademia de Cordoba adelanto muncho.
La komunidad judia de Cordoba, en la epoka de Hasdai, fue rika i vibrante. Ma, la situasion troko. En 1013, los berberes se establisaron en Cordoba, i la sivdad entro en un proseso de dekadensia. En los anyos sigientes, otro famozo savio de Cordoba, Moises Maimonides fue ovligado de abandonar la sivdad por la ferosidad del Alkazar. El tribunal de la Engizision establesido en Cordoba fue espesialmente kruel. Munchos konversos fueron martirizados durante la dekada de 1480. En 1483 los judios fueron arrondjados de Andalusia.
