Kada enverano mos vamos a la kampanya el empesijo de Junio. Ma este anyo tuvimos una Bat-mitzva el 18 del mez por esto kedimos un poko tadre para la kampanya. Ma no emporta teneremos ermozas okazyones para fiestarlas. En turko ay una dicha ke dize “La vinida de jueves, se entiende desde mierkoles”.
Bendicho el Dio ya vinimos a la kaza ke moramos desde 10 anyos, oyimos ke la kaza se esta vendiendo por modo ke las patronas ke son tres ermanas no se estan puedyendo akordarsen. Ya mos kayo la kara. Entrimos a kaza, elektrik no ay. Kualo? Ke afito? Mos kortaron la elektrisita por modo ke no estavamos en invyerno aki i aviya kedado una chika devda, ke no teniyamos haber kuando salimos en otonyo. Yamimos teknisyen, ya avriyo la ora. Ya estava bien. En supito vimos no tenemos agua. Guay! Ke afito? En lo ke entrimos ya aviya. La vizina de abasho sin darmos haber serro las valves por ke le estava koryendo agua abasho. Yamo un plomero, el disho ke no es de ande mozotros, es de mas ariva. I mos avriyo la valva. I esto ya se adovo. Eskapimos un poko de alimpyar, disho mi marido ke kere oyir las novedades, avrimos la televizyon, no se ve nada. I para esto yamimos un teknisyen. El teknisyen disho ke esta en vakansas i va pueder vinir para lunes. Bueno no ay ke azer. Lo estamos asperando. Digamos ke sin televizyon ya estava muy bien. No oyir las novelas ke mos erguele el korason. Ma ya mos auzimos, ni kon eya ni sin eya. Kijimos avrir el gaz para azer al menos un chay. Atyo ni esto no esta lavorando. Ayde telefoni a la kompanyiya, verdad ke ya vinieron pishin, era ke los buris de gaz se incheron de aver i kaliya avrir los botones para ke salga el aver de aryento. I esto se adovo. Del Dio ke en la izla este modo de teknisyenes se topan presto. Lavoran muy bien. Diya de Alhad dishimos ya eskapimos de alimpyar ya mos enstalimos, mos iremos a bever un chay al bodre de la mar. Ma tenemos ke irmos kon un moto-bisikleta porke mi marido malorozamente este anyo no esta puedyendo kaminar sin baston. Telefonimos al konduktor, disho ke esta en un funeray i no puede vinir. I esto mos kayo al pozo.
Agora ya se adovo todo, ya se alimpyo la kaza, ma kale ampesar a arekojer i topar otra kaza, para pueder transferarmos. Salud buena teneremos, todo ya se solussyona. Enveranada alegre teneremos.
