Keridos ermanos, ermanas, onklis, tantis, i amigos. Estamos bivyendo en una vida ke diya en diya se esta azyendo mas difisil. Se esta azyendo mas dura, no kedo piadad, no kedo amistad, kada diya ke pasa las personas se estan azyendo mas negras, ayudar kualo es mas no se save, vizindado no kedo, la kultura de la maale kualo es no save dinguno. Se izo la vida, ken tyene el chuflete lo tanya, en kurto te lo azere...
Por esto es verdad ke todos estamos bivyendo en el mizmo mundo, ma todos tenemos una filozofia de vida diferente, por esto kale bivir kon la verdad de la vida.
Kualo son las verdades de la vida?
En primero, ama antes de odiar, si te dan la mano, tu avre los brasos. Syempre partaja; partajar es muy emportante, no solo la ermozura, i lo negro kale partajar para tomar koraje, para gerrear kon lo negro. Los anyos ke tenemos no es emportante, es un numero solo, komo mos sintimos es los anyos ke tenemos, la kriyatura ke tenemos en la alma syempre kale ke este kriyatura, para ver ermoza a la vida. No kale azer problemes las chikas kozas, para azer la vida mas fasil. Syempre kale bushkar solusyon, porke solusyon, aze la vida mas oroza. Bushka la falta en ti mismo, dospues en otra persona, "de mi mas no se aze nada" no digas, syempre puedes azer unas kozas, no te espantes, solo ay dos kozas: kreyer i kerer.
Kita de la vida a las personas ke se azen orozas kuando ay problemes, solo ten amigos pozitivos. No te syentas amargo, syempre mira atras i dize "grasias al Dio".
Syempre kon la esperansa kamina en tu kamino, i aroga ke te salga enfrente personas djustas. Esta vida es komo un viyaje de treno, ken esta en un kompartamento, ken en un koltuk, ken esta en piyes, i ken esta mirando para topar un lugar. La ermozura de este viyaje es ke dingunos no saven en kuala estasyon ken va abashar u ken va suvir. Por esto en el treno, kale ke estemos kon buenas relasyones kon las personas, para ke el viyaje de la vida mos pase alegre i orozo...
Nunka no vos olvidesh de las verdades de la vida... Saludos i Abrasos
