Khirbet Kumran (en İvrit, solo Kumran; Khirbet en arabo kere dizir ruinas. En Turko tenemos la palavra “harabe” ke vyene de la mizma raiz) es por siguro uno de los lugares de los mas kritikados del medyo oriente, porke fue aya aze mas de setenta anyos ke toparon por la primera vez, uno de los royos ke yamamos “Royos de la Mar Muerta”. Este lugar djugo un grande rolo en la imajinasyon de la djente komo kultura jeneral, munchos artikulos se eskrivyeron, munchos filmos dokumentaryos i a vezes de sansasyon se izyeron enteresando un grande publiko, i syempre vizitado por munchos turistos.
Este lugar es bastante chiko situado en el Norte-Oeste de la Mar Muerta.
Este lugar esta muy serka de las grotas ande deskuvriyeron los tekstos de La Mar Muerta. Los tekstos fueron eskritos seya en Ivrit, seya en Arameo o seya en Grego. Kon las investigasyones arkeolojikas de las ruinas, Kumran parese ser un sentro militar en la epoka de los Hashmonaim, sentro ke se derroko en el rash del anyo 31 A.E.K (Antes de la Era Komun) sigun Flavius Joseph, el famozo istoryador Djudyo de la mizma epoka.
Otra koza ke mos aze pensar ke este sentro no devriya ser un sentro de los Essenis es ke se topo munchas kozas ke apartenesiyan a mujeres, savyendo ke los Esenis arondjavan las mujeres de sus vidas. En el simenteryo de 1200 tumbas, a lo menos las 300 eran tumbas de mujeres.
Este sentro ke oy los Arabos lo yaman Kumran, parese ser la sivdad yamada “Ir Ha Melah” “La Sivdad de la Sal” en el livro de Yeoshua. De otra parte los arkeologos Amir Drori i Yitzhak Magen, mos amostraron ke estas ruinas devriyan de apartener a un kampamento militar igual komo Masada. Esta fortalesa fue konstruida en un punto ande se enkontran los kaminos del komersyo i de la aktividad militar. Para estos arkeologos, las ruinas se formaron seya achakes de un atake militar o seya achakes del rash ke afito en el anyo 31 A.E.K. (Antes de la Era Komun) ke mensyono el famozo istoryador Djudyo, Flavius Joseph. Aparte de los ornos i de los pozos de agua ke fueron enkontrados, toparon tanbyen un monton de monedas de akeya epoka. El montante tan grande de monedas, mos da a entender ke el lugar fue un sentro komersyal o endustriyal mas ke un sentro de komunidad komo lo Esenis. Segun los arkeologos, este sityo kayo despues del anyo 70 de la E.K. (Era Komun), dunke despues de la kayida de Yerushalayim. Kon todo esto no podemos olvidar ke i los Esenis moraron en el mizmo lugar i desharon restos de sus vidas. Lo ke no savemos muy byen es la grandor de la povlasyon ke bivyo en esta era.
