La ermoza fyesta de Shavuot la fyestimos, adjustaremos muevas konosensyas.
1) Shavuot kontiene unos kuantos nombres: Shavuot (Semanas), Hag Akatsir (La Fiesta de la Rekolta), Hag Abikurim (Prezentasion de la Rekolta mueva), Atseret (Eskansar), Yom Aehel (Diya de Reunion).
2) Shavuot komo es kurto, se melda la noche (Tikun Shavuot) i sin durmir se melda eskritos del Zohar, de los Profetas i de la Tora.
3) Los 10 Komandamientos u bien (10) palavras se meldan 3 vezes al anyo
4) Entre Pesah i Shavuot mos kontan las etapas muy bien (TRAVAME VERSO TI) Salir de Ejipto; (ESTO KORYENDO VERSO TI) Los 49 Dias de Omer; (EL REY ME ENVITO A SU REYNADO) Matan Tora Darmos la Tora i tomar la Tora (KABALAT TORA).
5) Moshe Rabenu el 6 de Sivan suvyo al Monte Sinay i 40 diyas despues kuando abasho kon las Dos Tavlas de la Ley vido ke el puevlo de Israel esta baylando al entorno del la Vaka de Oro, i de la birra i dolor rompyo las Tavlas. I diyas arogo al Sinyor del Mundo de pardonar su puevlo, i miro a deskulparlo i aspero teshuva. Moshe el 1 de Elul suvyo de muevo al Monte Sinay i el 11 Tishri, diya de Kipur abasho.
6) En Shavuot se melda la Megilat de Ruth, la Grande Madre del Rey David. Ruth paryo a Oved, padre de Jeffe i Jeffe, padre de David. Ruth es la bendicha facha de la Shehina, la ke akompanyo en Galut el puevlo de Israel.
7) La Tora se dyo un diya de Shabat.
8) El puevlo de Israel al arivo a sus Tierras Santas, la Mana ke kayiya del sielo se korto ma la dalkavo kontinuo 14 anyos, tyempo de aresentar i kultivar la tierra.
9) Las Dos Tavlas son komo dos manos. La siedra es Justisya, la derecha Apiyadar
Dos ojos, el derecho Amar al de enfrente, i el siedro para Juzgarlo. 10 Palavras komo los enseyos, las eksperiensas de Avraam. 10 sefirotes, 10 Asetes de Misraim (de Ejipto). 10 etapas de la kreasion. (10 verbos) komo Dyo disho, Dyo izo, Dyo dikto ets… La Tavla de siedra, La relasion entre Dyo i el umano, la Tavla derecha las relasiones sosialas. Los ordenes de la Tavla siedra son paralelas a las de la derecha. Por egzemplio, “Anohi Ashem” (Yo so vuestro Dyo). La otra Tavla es atada al orden “No vas a Matar”. El ke kreye al Dyo, no mata.
10) De los 10 ordenes derivan las 613 mitzvotes: las 248 son pozitivas i son iguales a la valor de los organes del puerpo, 365 son negativas, son iguales a la Anyada del Sol i el nombre de muestros inyervos.
11) “Yo so vuestro Dyo" no es un orden ma una akseptasion, kuando ay kreensya en Dyo entonses es akseptar todos los preseptos.
Si amigos, ay muncho de kontar i eksplikar. No kero abuzar de vuestra pasensya ma kale repetar, no es 33 siglos antes ke el Dyo mos avla i mos adresa, es en kada diya.
Vos remersio de vuestra pasensya ermanos,vos oguro enveranada buena
Nota: En Shavuot se kome komidas kon leche. El kuento numeriko de Leche (Halav) es 40 igual a los diyas ke Moshe estuvo 40 diyas en el Monte Sinay.
Shavuot
De Pesah ya salimos
A Shavuot ayegimos
Kada paso ke echimos
Del Sinay mos aserkimos
El Omer ya kontimos
Kada noche bendizimos
Lag Baomer fyestimos
Bar Yohay kantimos
Miles de anyos paso
Dinguno nunka se olvido
Silva Filiba
