Kuando arivaron los djudyos al lugar nombrado Kadesh Barnea, en los kavos de el dizyerto Paran, arivando a este lugar, ya estava el puevlo muy serka de la tyerra de Kenaan i en pokos diyas ya puedian entrar a la tyerra de Kenaan, la tyerra prometida del Kriyador, i Moshe Rabenu por konsolar a el puevlo les dize, mis ermanos, ya vinitesh fin el monte Emori, al lugar ke el Todo Poderozo nos va darnos. Mirad ke vuestro Dyo ya vos apronto la tyerra delantre vozotros, suvid i apatronadvos de eya sigun la veluntad del Dyo, sin myedo ni espanto de nada. Malorozamente el puevlo de akel tyempo no meresyo gozar de la tyerra bendicha por sus mal komporto; se deperdieron i muryeron todos en akel dizyerto. Los djudyos sintyendo estas palavras de Moshe Rabenu, las entendyeron trokados i pensaron ke por endelantre no van a tener mas protejador, i es eyos kon sus fuersas i entelijensia ke tyenen de irsen a la tyerra prometida i sovre esto se van todos sin regla ni respekto onde Moshe Rabenu, i le dizen ke keren mandar eyos personas a esta tyerra para ke eskulken i vean, i ke les avizen kual es el kamino ke van a tomar, i kualos son las sivdades ke van a asigurar. I se olvidan enteramente ke Moshe Rabenu, sus pastor fidel esta kon eyos i ke esto todo no apartyene a eyos de pensarlo. Parese por el Dyo santo no era muy difisil de abondonar sus ideas yerrados i no deshar ke mandaran eskulkadores a un lugar ke el les esta regalando. Ma, el Todo Poderozo topo konvinivle sigun su alto saver de no defenderles esta demanda. Le dyo orden a Moshe Rabenu de desharlos azer su veluntad. Solamente ke le enkomendo ke mandara dodje personas onoradas, kaveseras de el puevlo, uno de kada trivo i le enkomendo ke lo ke van a ver ke se lo digan a el i ke entyendan ke el es sus kapo i sus rijidor. Moshe Rabenu izo el komando de el Kriyador i tomo dodje personas, uno de kado trivo, i los mando a la tyerra de Kenaan dizyendoles ke eskulkaran la tyerra i todas sus raportos, si es bueno su klima o no, i la djente de ayi ke manera son, si son fuertes o flakos, si son pokos o munchos i las sivdades ke moran, si son enkastelyadas o son avyertas i les dyo a entender la direksiyon ke tyenen de tomar, dizyendoles de pasar las montanyas por toparsen en la tyerra de Kenaan. Los eskulkadores en 20 de Sivan salyeron a kamino, ke les enbezo Moshe Rabenu, i rodearon i eskulkaron la tyerra 40 diyas. A la tornada no trusheron un raporto favoravle sino ke deskorajaron a el puevlo. Por esta kavza el puevlo djudyo kedo en el dizyerto 40 anyos i la nueva jenerasion tuvo la ventura de entrar a la tyerra prometida.
