Vamos a avlar de la Endjinara. Una verdura de rango imperial i de postura royal. Ken se puede eskonder mijor detrás de sus velos, ke la endjinara. Asta ke la enkontras deves de sudar, i tratarla kon muncho karinyo para ke yeges a su dulse pecho. Mizmo si tu te la olvidas i la deshas en une koshika de la kozina, eya se mete a ermozeyarse i a avrir florezikas de kolor violeta. I deke la vas a deshar? Ay ke pelarla kon muncha atansyon i kitarle una por una sus ojas. Las metemos en agua yelada kon limon i sal, para ke se sientan bien i no tornen a una kolor grizo preteyado, muy dezagreable a la vista. Deven de kedar bien vedre i achileyar las alas del korason. Es una legumbre ke en jeneral a los chikos no les plaze muncho. Ama kuando se engrandesen entienden su valor i toman plazer i savor a komerla.
La endjinara fue degustada i komida de diferentes maneras. Algunos tomavan las ojas buyidas una por una, las untavan delikadamente al azete i limon ke ya estava preparada en un resipyente profundo de porselana. Las ojas se chupavan kon grande savor, i era un momento de orasyon, de seremoniya kulinar divina. Dependiyendo del umor de la dama de kaza, a vezes las endjinaras se atakanavan kon bizelyas muy chikas, patatikas kortadas en forma de dedal, i para dar una kolor alegre pedasikos de safanorya se adjustavan. No olvidaremos ke la endjinara dekorada kon favas eran komo si fueran djoyas presiozas. La endjinara se puede servir komo salata, en forma de püre, i kon arroz.
Kuando se giza la endjinara kon el sumo de limon ande se desha deskansar la reina de las legumbres, para ke no troke de kolor i ke no tome una kolor preta, se sirve kon dereot ke gole una maraviya. Para los ke sufren del ligado, el sumo de la endjinara kon limon i miel es komo melizina. Los hazinos de tansyon i korason tienen siempre en sus platos una komida preparada kon endjinara.
En toda la kosta del Mediterraneo, se kultiva esta verdura. En syertos de estos paízes, algunos la komen kon sus kashkaras. Rogamos ke eya mos trayga la salud i buen provecho a todos.
