Empesando kon el vodvil i kontinuando kon la radio, el stand up, el sinema i la televizion, munchos de los komedienes en los Estados Unidos fueron judios. En los 1970’s ochenta por sien de los karikaturistos profesionales en los Estados Unidos eran judios.
El umor judio es diverso. Munchas de las anekdotes son djugos de palavras. En el umor judio topamos la ironia i la satira. Sus temas son anti-otoritarias i se burla de la vida relijioza i de la vida sekular. Sigmund Freud konsiderava ke el umor judio era uniko porke se burla de los judios mas muncho ke del "otro". En lugar de arebashar los judios, el umor kontiene un elemento de alavarlos.
El umor judio no es absurdo. Las anekdotas tienen un senso, tienen tambien un tema. Espesialmente tienen siertos temas spesifikos, komo la komida, la famiya, los echos, el antisemitizmo, la rikeza, la salud. El umor judio tambien es fasinado por las finezas del esprito, de la lojika, i del kamino kurto i eliptiko ke separa el rasionel del absurdo. El umor judio puede ser sarkastiko, keshadero, entregadero o deskriptivo. A vezes, el “punto” del umor es mas poderozo de la riza ke provoka. A vezes, la repuesta apropiada no es la riza, ma un djesto amargo o un suspiro de rekonosimiento. Esta kalidad didaktika detiene la persona de riir a las desgrasias de otras personas.
El umor judio tiene la tendensia de ser anti-otoritario. Se burla de la grandiozidad. Kita en medio la ipokrizia i kritika las hadras de las personas. Es fuertemente demokratiko i aksentua la dinyidad i la valor de la djente propajada.
El umor judio frekuentemente tiene un lado krítiko. Este avantaje krea dezrepozo a kitar en medio su punto. Su provokasion es polítiko, dirijido a lideres i otras otoridades, a los ke no se les puede kritikar mas direktamente. Esto se aplika a las figuras ke estan adelantre en la sosiedad en jeneral, komo por egzamplio los rabinos, kantores, savios, entelektuales, maestros, medikos, ombres de negosios, filantropistos i fonksionarios komunitarios. Una karakterístika espesial del umor judio es la interaksion de este janro de figuras kon la djente simple i las personas ke tienen dezavantajes, i estos salen ganadores a la fin. En jeneral, el umor judio se enteresa karakterístikamente en el konflikto entre el puevlo i los poderozos, sea el judio individual entre su komunidad, el judio enfrente el mundo non-judio, o la komunidad judia en relasion kon el resto de la umanidad.
El umor judio se burla de todos, inkluzo el Dio. Frekuentemente satiriza las personalidades i las institusiones relijiozas, los rituales i las dogmas. En mizmo tiempo, afirma las tradisiones i las praktikas relijiozas, bushkando un muevo entendimiento en las diferensias entre el santo i el ordinario.
