Los yerros son una parte de muestra vida. Se ven negativos, ma estos yerros en realita son una fuente de aprentisaje. Grasias a los yerros, ganamos eksperiensias, i puedemos tomar mijores desizyones en el futuro.
En primero dizeremos ke azer yerros es una parte de ser umano. Todos azemos yerros, chikos o grandes en muestras vidas. Lo emportante es entender las razones de estos yerros i ambezar o tomar leson de eyos. Los yerros nos ovligan a kestionar i mijorar muestros konosimyentos aktuales. Kuando azemos un yerro, kale ke pensemos mas profundamente i enderecharlos para bushkar solusyones alternativas.
Por egzemplo, un yerro ke izimos en la vida profesyonala, mos ayuda a ke agamos un plano mijor i mos ayuda a evaluar mijor los riskos. Tanbien los yerros ke izimos en la vida personal pueden ayudarmos a mejorar la empatia i pujar la entelijensya emosyonala.
Los yerros mos ambezan otruna koza, ke seyamos personas umbles i ke seyamos avyertos a las kritikas. Kale ke akseptemos muestros yerros i ke miremos ande i deke izimos este yerro. Para enforteser muestro karakter kale ke demos emportansa a las ideas de los otros. Ansina puedemos ser un kolaborador en armoniya.
En vezes en azyendo un yerro puedemos ser un enventor grande ke el yerro puede trokar el mundo.
Por egzemplo Kristof Kolomb en keryendo irse a la India, se yerro. Izo un yerro i se fue a las Amerikas.
Otro egzemplo de yerro es Aleksander Fleming. En la gerra estava melizinando los soldados ma se estavan muryendo de las yagas ke no se kuravan i aferravan mikropes. En azyendo bushkidades sovre melizinar estas yagas, estava siguro ke las lagrimas eran una sorte de kura para kurarlas, i komo topar tanta lagrima? Ma un diya por yerro desho una preparasyon en un bokal serrado i la preparasyon se enmofesyo. En egzaminando este mofo topo ke esta matando las bakteriyas. I ansina salio en medio la kura majika, la Penisilina.
Otro egzemplo mas muevo. Steve Jobs lavorava en Apple i en 1985 lo echaron del echo. Se penso ke yerro aviya echo? Avriyo su echo en NeXT i reusho muncho. En 1996, Apple merko la sosyeta NeXT, Jobs torno a Apple i izo ennalteser la kompaniya.
Walt Disney aviya fundado una kompaniya de filmos ke despues aviya fayitado. Topo el yerro ke izo en el negosyo i envento la figura de Miki Maus. Tomo lesones de su yerro i ansina ampeso de muevo kon inovasyones ke lo izo muy muy riko.
Kero dizir, los yerros pueden ayudar en vezes a trokar el akse (eksen) del mundo.
No mos olvidaremos ke ambezar de muestros yerros mos aze personas mas fuertes kon mas konosimientos i mas kompetentes.
