Anyos antes las galerias de arte organizavan ekspozisiones entre los mezes de septembre i mayo. I dospues tres mezes eran las vakansas o preparavan las ekspozisiones del anyo venidero. Ma ay un trokamiento muy emportante oy en diya. Kada viernes se publika el semanario Oksijen en muestro payiz i es una gazeta de dos o tres partes kon a lo manko 60 ojas. I estan presentando munchas ekspozisiones ke se estan realizando en las izlas Gregas kon artistos Turkos; en Bodrum ke oy en diya es un kazal bastante emportante para la sosiedad Evropea. Vemos mizmo el Sinyor Jeff Bezos; el mas riko del mundo, patron de Amazon, kon su yat de 136 metros kon 12 kamaretas mas luksuozos de los oteles de sinko estreas, ke esta en Bodrum i kreo ke esta muy kontente de estar en esta mar i en este kazal. Si tenesh pasensya puedesh ver ke las kazas en Bodrum tyenen una valor asta milyones i milyones de dolares. Los diyas de Bayram savemos ke serka de un milyon de personas se topavan en Bodrum.
Kon tantas personas ke tyenen posibilidad de merkar ovras de arte; turkos o estranjeros, los ke estan en este echo de arte organizaron (Demos Fuarcılık) una egzibision entre el 3 i el 7 de este mez kon 500 artistos internasyonales. I van a eksposar 3.500 ovras de arte. Reelmente un evenimyento de arte muy emportante. Durante esta egzibision van a presentar al artisto Devrim Erbil, ke bive dainda, el premio “artisto del siglo”. Esta ekspozision se va realisar en el Sentro Kultural Herodot.
Empesando del 4 de Julio la Galeria renomada Thaddaeus Ropac esta organizando kon sus artistos eskulptores/ras en Bodrum Loft una ekspozision. Syertos organizatores turkos van a ser responsavles de esta ekspozision.
La platforma de arte ande el sentro se topa en Estanbol: “Perasma” esta organizando en la izla Leros, una eksposisyon “All Things Become Islands Before My Senses” de oy asta el 18 del mez de Agosto. Los artistos Necla Rüzgar; Lindsey Mendick; Cevdet Erek i Evgenia Vereli van a tomar lugar en esta ekspozisyon.
Vos avli solo sovre dos o tres ekspozisyones ma en enverano es posivle de ver munchos evenimyentos artistikos en Estanbol i en otras sivdades de muestro payiz…
