En la pared de un restoran en Dubrovnik estava eskrito kon letras grandes “un dia sin vino es komo un dia sin sol”. En el Talmud dize, “No ay alegria sin vino”. Desde la antiguidad asta oy, el vino i el pan fueron los elementos bazikos de las selebrasiones familiales i se kree ke bever vino traye alegria al korason. Se uza para resivir el Shabat en la noche de viernes i para terminar en la noche de Shabat kon el biervo “LEHAIM” ke kere dezir, “A LA VIDA”. Se eskrivio una bendision espesial para ser resitada sovre el vino: La bendision hagefen.
Aze mas de 4000 anyos ke los Judios tienen una relasion kon el vino. Segun la Biblia i las tradisiones ebreikas, los antigos judios eran nomades i desde el tiempo de Avraam, en Kenaan, se izieron agrikultores i kultivaron la vinya para produsir “el rey de las beviendas”, el vino ke fue un simbolo de saviduria i de prosperidad. En los livros biblikos, la Tierra Prometida, la Palestina era una tierra muy prospera del punto de vista agrikola i fue reprezentada komo un paiz de trigo i de vino ke son simbolos de abundansia i de rikeza.
En muestros ritueles ,el vino es un simbolo de unidad i alegria de las fiestas i en la Biblia, Isak disho a su ijo preferido, “ke Dio te de bendisiones de los sielos i frutas de la tierra, abundansia de trigo i de vino”.
Aun ke el vino okupa un rolo sentral en el judaizmo i da un mental yeno de alegria, la Tora mos konseja de no konsumar el vino en ekseso para ser konsiente en frente de un peligro. Enborrachar para fuir de las responsabilidades ke tenemos enverso mozotros mizmos, enverso muestras famiyas i kon los ke tenemos al rededor es muy destruktivo.
Komo el umano, el vino tiene un siklo de vida. En primero empesa kon una formasion. Despues es el tiempo de su evolusion asta ke alkansa una maturedad. A la fin empesa el momento optimo en ke el vino mos da la mijor savor de el mizmo.
Komo dize el inglez, H.C.Dowland, “Algunos seres umanos se adulsan kon la edad komo el vino; ma otros se agrean komo el vinagre”.
