Los buchukes, Jack i Oskar tenian el mizmo DNA, la mizma naturaleza, ma salieron en medio komo dos personas diferentes. Nasidos en Trinidad en 1933, tenían sesh mezes kuando sus padre i madre divorsaron. Oskar se fue a Alemanya kon su madre katolika, Jack se kedo kon su padre judio. Oskar se engrandesio kuando los nazis vinieron al poder, estuvo saludando el direktor de la eskola en diziendo "Heil Hitler" i partisipo al movimiento de los Mansevos Hitlerianos.
De la otra parte, Jack siempre se amostro judio. Kuando tenia 15 anyos, su padre lo embiyo a Venezuela a bivir kon su tia. Su tia era una sovrebiviente de Dachau, i era la sola persona del lado de su padre ke estava en vida. Duspues de la gerra, la tia de Jack lo enkorajo a mudarse a Israel i kuando tenia 16 anyos, izo alia i partisipo a la Armada israeliana, konvertiendose en ofisial.
En 1954, Jack se fue a Alemanya para toparse kon su buchuk. Tenian 21 anyos kuando se toparon por la primera vez. La psikologa Nancy Segal konto la istoria de este renkontro en su livro “Vidas de buchukes ekstraordinarios”. Jack i Oskar se egzaminaron de parte a parte en mirandosen. La aparensia del otro era familiar. Sus diferensias kulturales estavan tan evidentes komo sus similaridades fízikal. Oskar miro kon sudeza a las etiketas del ekipaje israeliano de Jack, i le disho a su ermano ke vino de los Estados Unidos, i no de Israel.
El primer renkontro no paso bueno. Dos ermanos: el uno un judio orguyozo sirviendo en la armada israeliana i el otro un katoliko aleman serviendo en el movimiento de los mansevos nazi. Le avian embezado a aboreser a los judios. No pudieron komunikar muncho por modo del detenimiento de lingua. A la fin del renkontro, se dieron la mano komo ajenos i Jack se fue a San Diego, ande bivio el resto de su vida.
En 1979, Jack meldo sovre un estudio ke se estava realizando sovre buchukes i la grande diskusion entre naturaleza i kreensia. Demando si el i su ermano puedian partisipar i penso ke duspues de 25 anyos esto iva pueder krear otra oportunidad para versen i developar una relasion.
Jack Yufe i Oskar Stohr se toparon en el aeroporto de Minneapolis i deskuvrieron ke yevavan egzaktamente la mizma vistimienta: una jaketa blanka, una kamiza similar i gravata kon montura metalika. Durante el estudio, se ambezaron ke tenian muncho en komun. I los dos eran kaprisiozos i orguyozos, i los dos eran kompetitivos. I los dos meldavan livros en primero meldando la fin, i los dos sarnudavan muy fuerte, kaminavan de manera similar i los dos yevavan bandas elastikas alrededor de sus pusos. Mezmo ke munchas kozas de la naturaleza era en komun, la manera ke se engrandesieron los aviya echo diferentes. Nunka pudieron estar de akordo sovre kestiones sovre Israel i sus enemigos o sovre ken fue el responsavle de la Segunda Gerra Mundial. Kada vez ke Oskar estuvo avlando de los soldados alemanes en diziendo “mozotros” Jack se estuvo inyervando.
En un dokumental de la BBC sovre los buchukes, Jack disho ke estavan kontentes de estar endjuntos, ma siempre sus kreensias eran muy diferentes. Por esta razon no estavan puediendo tolerar el uno al otro. Jack se murio unos kuantos anyos antes de Oskar kuando tenia 82 anyos. Oskar se murio en el anyo 1997.
