En un payiz biviya un doktor muy famozo. Era espesyalisto de kriyaturas.
Un diya teniya de irse de la sivdad ande biviya a otra sivdad para dar una konferensya en un seminaryo. Se suvyo al avion, en medyo del kamino ampesaron relampagos. Una furtuna muy fuerte. El avion se topo en medyo de la turbulans i un relampago kayo ensima del avion i izo un danyo ke el avion no pudo mas kontinuar a su kamino, aterizo en el aeroporto el mas serkano.
Ya abasharon sanos, ma el doktor estava eksitado ke teniya de avlar en este seminaryo. Le disheron ke el proksimo avion va ser al diya ke viene. Alora se penso el doktor, va tomar un taksi i va kontinuar mi kamino. Ya estava todo bien, ampesaron a irsen. Ensupito ampeso una luvya ke se incheron las kalejas de agua i el shofor disho ke no va pueder mas kontinuar. Kualo azer? Estavan debasho de seles. De leshos vieron una kuliba. Se aserkaron i bateyaron la puerta. Una mujer les avriyo la puerta. Los kombido aryentro de kaza. Les dyo vistimyentas sekas, les ofresyo un chay, una supa kayente, i asperaron ke se kalme la luvya.
Akeya noche, noche entera no kalmo la luvya. El doktor vido ke en la kamareta ke estavan asentados, aviya una kuna, i aryento de esta kuna aviya una kriyatura muy chika ke no estava kitando boz.
Al diya ke ya aviya kalmado la luvya, el doktor kon el shofor le dieron munchas bendisyones i le disheron munchas grasias. En saliendo de kaza el doktor le demando a la mujer. Deke esta kriyatura no esta kitando boz. Le respondyo la mujer: Es mi kriyatura ke tiene una hazinura muy rala. Ya la yevimos aki a munchos doktores i espitales ma mos disheron ke solo un doktor puede salvarla. I este doktor bive en otra sivdad. Mozotros no tenemos la posibilita de irmos a akeya sivdad por esto la estamos mirando komo puedemos. Lo ke puedemos es ke esto arogando noche i diya de aryento de mi korason i mi alma, ke se pueda topar un remedyo para su hazinura.
Al doktor se le incho los ojos. Se penso i entendyo, la furtuna del avion, i los seles en el kamino. Era un mirakolo de los sielos ke lo trusho al pie de la kriyatura hazina.
Le disho a la mujer de no espantarse i no merikiyarse ke de oy adelantre tu kriyatura esta en mis manos i en poko tiempo se va sanar. Yo so akel doktor ande te rekomendaron.
Mirá la fuersa de las orasyones kuando se dize de alma i de korason. La fuersa de las orasyones depende siguro de la fe de la persona, de su intensyon, i de la devosyon a las orasyones. En estos diyas tenemos de menester de arogar arogar arogar...