“Los banyos, el vino i el sekso pueden danyar el puerpo; ama son estas kozas ke azen ke la vida seya meresida para bivirla”.
Una inskripsyon tumbal ke se enkontro en una tumba del siglo 2 de la E.K. (Era Komun) en Efesos. El ombre ke estava enterrado en esta tumba se yamava “Tiberius Claudius Secundus”.
Un doktor muy famozo yamado “Galenos” bivyo en la mizma epoka ke este ombre “HEDONISTO” (ke save tomar savor de la vida). El doktor Galenos bivyo en Pergamon ke en Turko yamamos “Bergama”, kazal ke esta en el norte de İzmir. Fue doktor de los emperadores Romanos porke estuvo i en Bergama i en Roma. Era en mizmo tyempo i filozof, i operator, i farmasyen, i biologo.
Por si mizmo el se dize ke “Para entender una koza, ay ke estar sovre dos pyezes: El uno es el “logos” ke kere dizir la Razon. El otro es la Eksperiensa. Sin la razon i sin la eksperiensa no puedes topar lo djusto” diziya syempre. Tanbyen adjustava: “Para tener una buena salud, el umano deve de tener la responsabilidad de su proprio puerpo. Saver lo ke se esta komyendo i no entrar al ekseso, azer jimnastik, bever agua, respirar ayre limpyo i durmir byen son las kozas primordyal para la salud.
Yene segun este doktor, la salud de la alma devriya ser parte de la salud del puerpo. Una buena koensidensya es ke el ospital Asklepyon dedikado al dyo Asklepyos esta en Pergamon ande Galenos bivyo. Este ospital se enkargava de las hazinuras de la alma en jeneral. La ija de este dyo se yamava “Hygieia” i era responsavle de la limpyeza o de la Hijyen. Por esto, lavarse en agua limpya era una forma de respektar esta diyosa. En las tradisyones de Anatolia egziste un doktor ke se yama “Lokman Hekim”. Un doktor kaji kon la mizma figura ke Asklepyos. Konosiya todas las yervas para azer kuras, viniya al lado de los hazinos para darles las melizinas ke nesesitavan i teniya mil konsejos para ke el umano tenga un puerpo yeno de salud i ke pueda bivir munchos anyos.
El primer prezidente de la Republika Turka, Mustafa Kemal Atatürk diziya “Kavesa rezya se topa ensima de puerpo rezyo”. Kreyo ke i en la epoka de Galenos, pensavan de la mizma manera.
