Es diya de Alhad ke se realizo el segundo torno de las eleksyones en Fransia. Ay anyos ke el Prezidente de la Republika, el Sinyor Macron sin tener un partido bastante poderozo se topa en la kavesa de la Fransia. Dospues de las eleksyones del Konsilio Evropeo ande el partido de Marine le Pen fue el ganador, el Prezidente Macron dyo karar de anular el Parlamento i lo anulo. Era reelmente un kumar. I vimos ke pyedro en el primer torno. Es Marine le Pen i el partido del eksesivo derecho ke fue la estreya de estas eleksyones. La Fransia entera s’espanto de este partido i dyeron karar ke los ke estavan en la tresera sira se retiraron. I reelmente todo troko. Los de eksesiva syedra suvieron al primer rango. El partido de Macron el segundo rango i los vensedores del primer torno abasharon al treser rango.
No se si va ser muy fasil de pueder topar un primer ministro ke va ser achetado por la mayoria de la Asamble Nasional. Reelmente la politika franseza esta en una situasion bastante problematika. El Sinyor Jean-Luc Melenchon, ke es uno de los mas emportantes lideres de la eksesiva syedra disho ke esta pronto para ser primer ministro. Vamos a ver si va pueder formar un governo kon los parlamenteres ke son serka de Macron.
En la Inglatiera, el Partido de los Lavorantes vinieron al poder 14 anyos dospues. Reelmente estuve muy kontente. No so rasisto ma penso ke no es muy konforme ke un Indiano sea el primer ministro de la Inglatiera. Es la mizma koza por la Eskosia. El prezidente o el primer ministro deve de ser un miembro de la mayoria del payiz. Ya savemos ke el primer ministro Rishu Sunak es un ombre bastante riko i su mujer mas rika ke el. Kon las leyes de la Inglatiera tuvo la posibilitad de no pagar dasyo para las milyardas ke gano.
En Iran en el segundo torno, el reformisto Pezeshkiyan ke tyene orijines turkas fue elijido komo prezidente del payiz. El Sinyor Celili ke era el konservativo, no reusho a venser el reformisto. I esto es un rezultado ke me dyo plazer. Porke la grande partida de los Iranianos estan kontra este modo de vida.
Este anyo empesando de los Estados Unidos, munchos payizes van a ser shaetes a las eleksyones en sus payizes. Espero ke personas bastante intelijentes van a ser kandidados a estos postos. El mundo esta asperando la Pas.
