Entre los dulses yo eskoji el ‘Ashure’. Solo por el nombre ya mos kayen las bavas. Este Ashure yo lo va preparar, agora ke estamos en kaza ay ke amostrar la kapachidad de las mujeres Djudias... Ya van a entender el porke.
Es ke tengo ganas de dar un torniko en PERA, i echar una mirada a Lebon i a Markiz, ke kaji kedan komo una solombra palida de los anyos pasados. Dando una mirada a estas dos patiserias, estava sonyandome de los diyas kuando los ombres saliyan kon kravatas o papyones i las mujeres kon chapeyos o etoles elegantes, a la Grand Rue de Pera. Esto era para aparejar el Ashure, i para kompletar lo ke vamos a meter al Ashure, sinko puntos mas para yegar al Pera Palas kon sus salones i kupulas somptuozas, i los tavanes elegantes ornados kon muncho gusto. Adjustamos un poko de nostaljiya al dulse. Pera Palas keda enfrente de la Union Fransez ke fue tanbien sentro de amores romantikos i mos va dar un savor espesyal a muestra meskla. Tilla un poko mas ariva, kaji enfrente de “petits-champs” de muestra chikes... Tilla esta vez, para mozotros, va ser las frutas sekas de kalidad ke van a dar la ultima kalidad a la meskla de muestro Ashure orijinal... Mos keda el parfum de roza para arufiar el Ashure gurme espesyal. Sin duda vamos a pasar por Jardin Taksim, i vamos a yegar al Park Otel lejendario de los anyos pasados i dekorar kon elegansya muestro Ashure feeriko kon el sumo de las rozas aromatikas muy espesyales…
Agora arimandomos a muestras poltronas komodas, kon las kucharas de plata i dientes de oro, komeremos el Ashure spesial ke gano 5 estreyas Michelin. Afiyet Olsun. Salud i Beraha i Refua.
