Los ijos de Israel vinyeron a el lugar nombrado Arvot Moav. Enfrente de la sivdad de Yereho. Este paso ke dyeron los ijos de Israel i las viktoryas ke estavan ganando kon la ayuda de Kriyador izo retemblar muy muncho a el puevlo de Moav. Los moradores de Moav kijieron venserlos a los djudyos kon unos remedyos afuera de la natura.
Sovre esto, el rey de Moav, Balak, se akonsejo kon el puevlo de Midyan, ke manera azer por kitar de el mundo a el puevlo djudyo. Desidaron entre eyos de mandar a yamar a Bilam, el echizero ke morava en Peor para ke maldiga a los ijos de Israel. Mandaron unos grandes personajes de la sivdad de Moav i de la sivdad de Midyan i vyenen onde Bilam, i le rogan al nombre del rey de Moav, Balak, de vinir kon eyos a la tyerra de Moav i maldizir a los djudyos. Las personas ke mando Balak le dizen a Bilam, nuestro rey Balak esta muy siguro ke a ken maldizes es maldicho i a ken bendizes es bendicho.
Bilam les dize ke el no es un echizero sino ke es un profeta ke esta debasho de el orden del Dyo santo, ke esperen una noche i el les respondera.
El Dyo aparese su vizyon a Bilam i le demanda ken son estas personas ke vinyeron onde ti? Bilam le responde ke son mandados del rey de Moav para ke vaya ayi i maldiga a Israel. El Dyo le defende de ir a maldizir a los djudyos syendo el puevlo djuyo es un puevlo bendicho.
A la manyana les dize Bilam a los mesajeros ke se tornen a sus lugar ke el Kriyador no lo desho ir kon eyos. Balak le mando otras personas i mas onoradas i le promete muncha plata i oro de azerle todo lo ke demanda. Bilam ke sintyo estas promesas de el rey Balak, los detyene a los mesajeros una noche i va se enforma, lo ke va kerer el Dyo de avlar.
El Kriyador se aparese otra vez a Bilam i le permete de irse kon eyos onde Balak, ma a kondisyon ke no puede avlar mas ke lo ke le va ordenar el Kriyador. Bilam, aun ke ya entendyo byen ke la veluntad del Dyo es bendizir a el puevlo djudyo i no maldizirlo, kon toda la esparansa de la buena paga i de la muncha onra ke tyene ke resivir de Balak lo izo yerrar i se levanta kon muncha kovdisya i se va kon las personas de Balak.
Bilam no reusho a maldizir a el puevlo djudyo, syendo ke no lo desho el Kriyador ke maldiga a el puevlo djudyo, sino ke los bendisho a el puevlo kon estos biervos:
O, puevlo santo de Yaakov, kuantas ermozas i buenas i onestas son tus tyendas, i tus moradas.
