Keridos Lektores,
Traduizi una partida del rezumen de la perasha de la semana pasada ke me plazyo.
Tenemos muncho mas de lo ke pensamos. En eksplikando la parte de la “Mishna” ke esta dizyendo, ke estamos edukados para pensar ke tenemos muy poko kuando todos tenemos tanto. La grande partida de mozotros estamos tan auzados a sentrar muestra atansyon en lo ke no tenemos, ke mos olvidamos de lo ke tenemos.
Uno de los mijores konsejos ke se les puede dar a los mansevos kazados, es ke lo emportante no es el dia de la boda, sino el dia vinidero.
Si el amor, el respekto i el kompartir pueden propajarsen a los dias vinideros, esto sinyifika ke ya se ayego al punto dezeado.
Si estamos sanos i rezyos, si tenemos una famiya, un echo, si tenemos lo ke mos yevara asta el futuro, reelmente tenemos muncho.
Una istorya: Un aedado ke pasa la grande partida del dia asentado en el balkon de su kaza a la entrada de la sivdad, un dia un visitor de otra sivdad vyene i le demanda komo es la sivdad en la ke bive. El aedado le demanda en primero de kontarle komo es la sivdad ande el mora.
El vizitor empesa a dizirle, ke la sivdad ande mora es una sivdad orrible, ke tyene un klima terrible, ke es una sivdad fea i ke esta yena de djente.
El aedado le responde ke la sivdad ke mora es djustamente lo mizmo ke konto el den frente.
El dia vinidero otro vizitor vyene i le demanda al aedado la mizma demanda. La repuesta del ombre no troka.
En primero le demanda al den frente de kontarle komo es su sivdad.
El vizitor le dize ke la sivdad ande bive es muy ermoza, pozitiva i agradable.
El aedado le responde en dizyendole i ke su sivdad es lo mizmo.
Una tresera persona ke esta oyendo lo ke estan avlando, demanda la razon de esta kontradiksyon, ke en primero disho ke esta sivdad es orrible, i despues disho ke es muy ermoza.
El aedado le responde en dizyendole: Ke lo mas emportante no es la sivdad, es la fason de mirar de la persona.
La grandor materyel no puede determinar el nivel de felisidad de las personas.
Devemos de trokar muestro punto de vista, para pueder ser orozos kon le ke tenemos.
